Farg‘onaning "Neftchi" klubi himoyachisi Dostonbek Tursunov klub rasmiy sayti uchun intervyu berdi.

Himoyachi O‘zbekiston kubogidan o‘rin olgan "Bunyodkor"ga (1:3) qarshi o‘yin haqida gapirar ekan, yaqin kunlarda boshlanadigan ikkinchi davradagi maqsad va vazifalarga ham to‘xtalib o‘tdi.

"“Bunyodkor”ga qarshi o‘yinning birinchi bo‘limida yaxshi harakatlandik“,-deb gap boshladi Tursunov.  Afsuski, to‘liq o‘yin davomida mana shunday bo‘lmadi. Xatolar kuzatildi. Gollar raqibni kuchli mahorati yoki bosimi natijasida yuzaga kelmadi, balki o‘zimizning  kamchiliklarimiz sababli ketma-ket gol o‘tkazib yubordik. Jamoa deyarli yangilangan, shu bois ilk bahsda bir-birimizni tushunish qiyin bo‘ldi. Bu vaqtincha holat. Sekin-asta jamoa jipslashib boradi. Umuman olganda o‘yin menga yoqdi. Toshkentliklarga yetarli muammo tug‘dira oldik, bahsni nazorat qildik, ketma-ket xavfli hujumlarni amalga oshirdik. Ochig‘i, kamida 3 gol urishimiz mumkin edi. Ammo vaziyatlardan foydalana olmaslik bizga ko‘p pand berdi. Bu “Neftchi”ning eng yaxshi o‘yini emas. Biz hali chempionat davomida yanada kuchliroq futbol ko‘rsatamiz.

“Bunyodkor” jamoasi? Ha, ular haqida fikrim ijobiy hisoblanadi. Lekin bizdan yaqqol kuchli jamoa emas.

Ma’lum vaqtdan so‘ng yana “Neftchi”ga qaytdim. Bu jamoa men uchun juda ham qadrdon sanaladi. Ochig‘i, Farg‘onaga qaytishim oson kechmadi. Vadim Abramov jamoasidan taklif har qanday futbolchi uchun yoqimli tuyulsa kerak. O‘zimda ham “Neftchi”dan o‘ynash uchun xoxish bor edi. Hozir bizni turnir jadvalida egallab turgan o‘rnimiz umuman “Neftchi”ga mos emas. Bu klub haqida barcha yaxshi biladi. Bizni ikkinchi davra kutmoqda. Vaziyatni o‘nglash, jamoani 15-o‘rindan olib chiqib ketish uchun bor kuchimizni beramiz. Mavsum so‘nggiga borib dastlabki oltitatalikda bo‘lishni istardik" - dedi Tursunov.