O‘zbekiston Kubogi 2017 yarimfinali doirasida “Lokomotiv” bilan “Nasaf” bellashadi.
“Nasaf” bu bilan o‘z tarixida ketma-ket yettinchi bor O‘zbekiston kubogi yarimfinalida ishtirok etadi. Jamoa ustozi Ro‘ziqul Berdiyevning murabbiylik faoliyatidagi oltinchi yarimfinal bo‘ladi.
2003 yilda "Nasaf" "Navbahor" bilan yarimfinalda kuch sinashgan va ilk marta finalga chiqqan.
2011 yili “Nasaf” yarimfinalda “Bunyodkor”ni, 2012 yil “Buxoro”ni, 2013 yil “Paxtakor”ni mag‘lub etib, finalga yo‘l olgan edi. 2014 yili ham qarshilik futbolchilar kubok yarimfinalida ishtirok etishgan ammo, ikki o‘yin natijasiga (0:1, 1:1) ko‘ra, “Bunyodkor” kubok finalchisiga aylangan. 2016 yili “Nasaf” yarimfinalda “Buxoro”ni mag‘lub etib (2:0, 2:1), finalga chiqqan.
Bu yil “Nasaf” kubok yarimfinalida ikkinchi marta “Lokomotiv” bilan hisob-kitob qiladi. Esingizda bo‘lsa, 2015 yilgi yarimfinalda aynan "Nasaf" “Lokomotiv” jamoasini (2:0, 0:1) mag‘lub etib finalga yo‘l olgan edi.
2015 yilgi yarim final uchrashuvlarini esga olamiz. O‘sha yilgi yarim finalning dastlabki uchrashuvi Qarshida bo‘lgan. Unda "Nasaf" “Lokomotiv”ni 2:0 hisobida dog‘da qoldirgan. Uchrashuvdagi gollarni birinchi bo‘limda Azamat Allaniyozov va Shohruh Gadoyev kiritishgan.
Javob uchrashuvi 15 sentyabr kuni Toshkentda bo‘lib o‘tgan. Unda “temiryo‘lchilar” kichik 1:0 hisobida g‘alaba qozonishgan. Uchrashuvdagi yagona gol muallifi Marat Bikmayev bo‘lgan. Har ikkala uchrashuv hisobiga ko‘ra, “Nasaf” finalga yo‘l olgan. Demak, mazkur jamoalar o‘z tarixida ikkinchi marta yarimfinalda tuqnash kelishmoqda.
Yana qiziqarli faktlardan biri shuki, hozirgi paytda "Nasaf" sharafini himoya qilayotgan tajribali yarimhimoyachimiz Jasur Hasanov 2015 yilgi yarimfinal uchrashuvlarida “Lokomotiv” safida maydonga tushgan.
Hozirgi paytda “Lokomotiv” jamoasi safida to‘p tepayotgan Shuhrat Muhammadiyev esa, “Nasaf” tarkibida maydonga tushgan. Hatto u Qarshida bo‘lgan dastlabki uchrashuvning eng yaxshisi ham bo‘lgan.
Eslatib o‘tamiz, "Lokomotiv" - "Nasaf" jamoalari o‘rtasidagi O‘zbekiston Kubogining yarimfinali dastlabki uchrashuvi, "Lokomotiv" stadionida 2 avgust chorshanba kuni soat 19:30da boshlanadi.
