"Navbahor" navbatdagi turda "Neftchi" bilan bellashadi.   "Paxtakor"dan qaqshatqich mag‘lubiyatni qabul qilib olgan farg‘onaliklar endi qanday qilib bo‘lmasin "Navbahor"ni mag‘lub etib, muxlislarni tinchlantirmoqchi. Lekin bunga "Navbahor" yo‘l qo‘yarmikin?   Oldinda kutib turgan derbi xususida "Navbahor" bosh murabbiyi Ilhom Mo‘minjonov o‘z fikrlari bilan o‘rtoqlashdi.   - Jamoamiz a’zolari "Neftchi" bilan o‘tadigan uchrashuvga tayyorgarlikka bugundan Namanganda kirishdi, - deb gap boshladi murabbiy.    - O‘yin oldidan bo‘shashmaymiz. Negaki, "vodiy derbi”lari doimo murosasiz va keskin ruhda kechgan.  Qolaversa, o‘z maydonimizda "Neftchi” bilan alamli durang qayd etgandik. Shuni o‘rnini to‘ldirishni maqsad qilganmiz. To‘p yumaloq, maydon tekis deb aytishadi. Nima bo‘lgan taqdirda ham ijobiy natijani qayd etish uchun ishlashda davom etamiz. Turli xil gap-so‘zlarni paydo bo‘lishi esa bizni yanada kuchaytiradi. Qaysidir joyda xatoga yo‘l qo‘yganmiz yoki oqsoq joyimiz borki, muxlislar e’tiroz bildirishadi. Bunga javoban o‘z ustimizda yanada ko‘proq ishlab, yuqori natijalar sari intilamiz, - deb fikrini yakunladi Ilhom Mo‘minjonov.