Oliy liga 17-turidan o‘rin olgan "Navbahor" - "Qizilqum" (3:2) o‘yinidan so‘ng, yosh yarimhimoyachi Azizbek Turg‘unboyev o‘z fikrlarini aytdi.

"G‘alabani qo‘lga kiritish qiyin bo‘ldi. So‘nggi o‘yinlarimizning aksariyati durang bilan tugab kelayotgandi. Xudoga shukur, noxush an’anaga (Namangandagi so‘nggi 4 o‘yinda durang kuzatilgan) chek qo‘ydik. Bundan buyog‘iga ham faqat g‘alaba uchun maydonga tushamiz. Xudo xohlasa, "Navbahor"ni yuqori o‘rinlarga ko‘tarishga harakat qilamiz.

Gol urganimdan so‘ng xursandchilikdan libosimni yechib yubordim. Xal qiluvchi gol muallifiga aylanganim sababli xissiyotlarimni boshqara olmadim. "Neftchi"ga qarshi o‘yin? Farg‘onaliklar bilan doim o‘zaro uchrashuvimiz murosasiz kechgan. Derbi maqomidagi o‘yinga ortiqcha ta’rif berishni xojati yo‘q. "Neftchi" bilan qarama-qarshilikda ham muxlislarimizga g‘alabani taqdim etishni maqsad qilganmiz. Albatta, raqib ham kuchli jamoa. Abramov shogirdlari "Paxtakor"ga yutqazishgani "Navbahor"ga qiyinchilik tug‘diradi. Chunki ular bizga qarshi bellashuvda 3 ochko uchun tish-tirnoqlari bilan kurashishadi. Farg‘onada barchani qiziqarli to‘qnashuv kutmoqda", - dedi Turg‘unboyev.