Nigeriyalik Jey-Jey Okocha Afrikaning turli davrlardagi eng iqtidorli futbolchilaridan biridir. U mamlakat terma jamoasining oltin davrida o‘zini ko‘rsata olgan.
Uning jamoasi 1996 yili Atlanta Olimpiadasida oltin medallarni qo‘lga kiritgan. Shuningdek, 1994-2002 yillarda bo‘lib o‘tgan uchta jahon chempionatida ishtirok etgan. 23 oktyabr kuni Londonda FIFAning taqdirlash marosimi bo‘lib o‘tadi.
Okocha ushbu tashkilot rasmiy saytiga bergan intervyusida bu boradagi afrikalik futbolchilarning imkoniyati haqida gapirib o‘tdi.
- Siz texnik futbolchilardan biri bo‘lgansiz. Tashqaridan futbol o‘ynab rohatlanayotganingiz ko‘rinib turardi. Shu jihatlar kuchli o‘yinchiga aylanish uchun yetarlimi?
- Eng yaxshilardan biri bo‘lish uchun ko‘prog‘i kerak. O‘zingizni yangi darajaga olib chiqish uchun tinimsiz mehnat qilib, bor e’tiboringizni futbolga qaratishingiz lozim. Agar iqtidoringiz bo‘lsa, raqobatdan aslo cho‘chimaslik kerak.
- Bugungi kunda sizga o‘xshash futbolchi bormi?
- O‘yin uslubi o‘xshab ketadiganlardan biri Neymardir. U xuddi men kabi rohatlanish uchun futbol o‘ynaydi, kasbini yaxshi ko‘radi. Bu bilan o‘zi uchun yoki muxlislarni shunchaki xursand qilish uchun to‘p suradi, demoqchi emasman. Albatta, Neymar jamoaviy o‘yinchi. Ya’ni o‘z iqtidorini jamoa manfaati uchun namoyish qiladi.
- Sizningcha, u Krishtianu Ronaldu va Lionel Messiga o‘rinbosar bo‘la oladimi?
- Ha. Menimcha, buning uddasidan chiqadi. Messi va Ronaldu jahon futbolida o‘n yildan buyon yetakchilik qilishmoqda. Endilikda ular o‘rinlarini kimgadir bo‘shatishlari kerak. O‘ylaymanki, bu maqom Neymarga nasib etadi.
- Ronaldu va Messi oxirgi o‘n yillikda muvaffaqiyat qozonib kelishmoqda. Ularning qay birini ustun qo‘yasiz?
- Bu borada diplomat bo‘lishim kerak. Portugaliyalik do‘stlarim ko‘pligiga qaramay, Messini ustunroq qo‘yaman. Uning tug‘ma iqtidori bor. Ronaldu fantastik futbolchi, men ko‘rgan o‘yinchilar orasida eng kuchlilaridan biridir. Lekin Leo baribir ustunroq.
- Sizningcha, afrikalik futbolchi FIFAning yil o‘yinchisi mukofoti da’vogarlari orasida kuchli uchlikka kira oladimi?
- Hozir bu ishni eplay oladigan biror-bir futbolchini alohida ko‘rsatish qiyin. Afrikaliklar xalqaro arenada hali yetakchi o‘yinchilar bilan raqobatlashish darajasiga chiqmadilar.
