Kecha, 5 sentyabr kuni bo‘lib o‘tgan O‘zbekiston–Janubiy Koreya uchrashuvi (0:0) dan so‘ng hujumchi Aleksandr Geynrix terma jamoadagi faoliyatini yakunladi.
Bu haqda Geyrnixning o‘zi uchrashuvdan so‘ng avtobusga chiqayotganida aytib o‘tdi.
“Janubiy Koreyaga qarshi o‘yin men uchun oxirgisi bo‘ldi. Barcha muxlislarga rahmat aytaman”, deya avtobusga chiqib ketdi Aleksandr Geynrix.
Ma’lumot uchun, Aleksandr Geynrix O‘zbekiston terma jamoasi safida 2002 yildan beri faoliyat yuritib kelardi. U jami 94 uchrashuvda maydonga tushib, 31 marta gol urgan va O‘zbekiston terma jamoasi to‘purarlari ro‘yxatida Maksim Shaskixdan (34) keyin ikkinchi o‘rinni band etib turibdi.
Shuningdek, terma jamoa safida eng ko‘p o‘ynagan futbolchilar ro‘yxatida ham 5-o‘rinda bormoqda. 124 marta maydonga tushib, 25 ta gol urgan Server Jeparov bu borada yaqqol ustunlikni o‘zida saqlab turibdi.
Eslatib o‘tamiz, O‘zbekiston kecha Toshkentda Janubiy Koreya terma jamoasi bilan 0:0 hisobida durang o‘ynab, jahon chempionatiga chiqish yo‘llanmasidan mahrum bo‘lgandi.
