«Arsenal» jamoasi bosh murabbiyi Arsen Venger Aleksis Sanches uchun 60-70 mln funt (65-76 mln yevro) qo‘lga kiritishi mumkin bo‘lgani haqida gapirdi. Ushbu futbolchini yozgi transferlar oxirida «Manchester Siti» qo‘lga kiritishga harakat qildi.
«Aleksisda yana bir yillik shartnoma qolgan. Biz uning uchun taklif qilingan 60-70 mln funtni rad qildik, chunki, bunday futbolchi ketsa, uning o‘rnini to‘ldirish kerak. Bugungi kunda Angliyada shartnomasi tugashiga bir yil qolgan 107 futbolchi bor. Bunda ikki muhim jihat mavjud. Birinchidan, bunday futbolchilarning barchasi juda yuqori maosh talab qiladi. Ikkinchidan, klublar klubni jiddiy ravishda o‘zgartira olmaydigan futbolchilar uchun katta pullarni to‘lashni istashmaydi.
Transfer narxlari haqiqiy hayotdan uzilib qoldi. Mana qarang: Usmon Dembele o‘tgan yili 15 million yevro edi, endi esa — 150 million yevro. Uni qanchalik yaxshi tarbiyalashgan bo‘lmasin, bir yil ichida narx 135 million yevroga oshishi mumkin emas», — degan Venger beIN Sports efirida.
