Bugun, 12 sentyabr kuni Toshkentdagi Radisson BLU mehmonxonasida O‘zbekiston Futbol Federasiyasining hisobot-saylov konferensiyasi bo‘lib o‘tdi.

Kun tartibidan ma’muriy masalalar, prezident murojaati, O‘FF prezidentining o‘tgan yillar mobaynida olib borgan ishlari hisoboti, moliyaviy va buxgalterlik hisobotlari, Ijroiya qo‘mitasi tavsiyasiga ko‘ra mustaqil auditorlarni tayinlash va eng asosiysi O‘FFning yangi prezidenti, vise-prezidentlari va Ijroqo‘m a’zolarini saylash kabi masalalar o‘rin oldi.

O‘FF prezidenti lavozimiga yozma ravishda taqdim etilgan Ahmadjonov Umid Maxamatjonovich nomzodi barcha delegatlar tomonidan bir ovozdan qo‘llab-quvvatlandi.

O‘zbekiston Futbol Federasiyasining birinchi vise-prezidenti etib O‘zbekiston Bosh vazirining birinchi o‘rinbosari, “O‘zbekiston temir yo‘llari” AJ raisi Ramatov Achilbay Jumaniyozovich, vise-prezident lavozimlariga esa O‘zbekiston Ichki ishlar vaziri Bobojonov Po‘lat Razzoqovich hamda O‘zbekiston Davlat Jismoniy tarbiya instituti rektori Isroilov Shoakram Xolmatovich saylandi.

Shuningdek, O‘FF Ijroiya qo‘mitasining yangi a’zolari saylandi. Quyida ular bilan tanishish mumkin:

Qurbonov Rustam Javdatovich – O‘zbekiston Jismoniy tarbiya va sport davlat qo‘mitasi raisi Shodiyev Bobur Kabulovich – “Paxtakor” PFK prezidenti Aliyev Murod Boqiyevich – “Bunyodkor” PFK bosh direktori Rajabov Mansur Qo‘chqorovich – “Lokomotiv” PFK prezidenti Yarashev Komil Dehqonovich – O‘zbekiston Davlat Jismoniy tarbiya instituti prorektori Jalolov Narimon Jalolovich – O‘zbekiston futbol faxriylari kengashi raisi

Konferensiya davomida O‘zbekistonda xizmat ko‘rsatgan murabbiy Ro‘ziqul Berdiyev, O‘zbekiston futbol faxriylari kengashi raisi Narimon Jalolov so‘zga chiqib, o‘tgan yillar mobaynida amalga oshirilgan ishlab haqida to‘xtalib, O‘FFning sobiq rahbariyatiga minnatdorlik bildirdi.

O‘FFning yangi prezidenti etib saylangan Umid Ahmadjonov unga bildirilgan ishonch uchun barchaga tashakkur bildirib, O‘zbekiston Prezidenti Shavkat Miromonovich Mirziyoyev rahnamoligida o‘zbek futbolini yuqoriga ko‘tarishga harakat qilishga va’da berdi.

“Ishonchingiz uchun minnatdorchilik bildiraman. Xudo xohlasa keyingi xalqaro musobaqalarda va Olimpiya o‘yinlarida birgalikda, maslahatlashgan holda. O‘zbek futbolini ko‘tarishga va’da beraman. Bundan buyon muhtaram Prezidentimiz Shavkat Miromonovich Mirziyoyev va xalqimizni xursand qilib, futbolimizni birgalikda ko‘taramiz degan umiddaman”, – dedi O‘FFning yangi prezidenti Umid Maxamatjonovich.

Konferensiya yakunida O‘FFning sobiq prezidenti Mirabror Usmonov ham so‘zga chiqib, so‘nggi yillarda olib borilgan ishlar, bo‘lib o‘tgan kamchiliklar borasida to‘xtalib, yangi rahbariyatning ishiga omad tiladi.

Mirabror Usmonov O‘zbekiston futboliga qo‘shgan ulkan hissasi uchun tantanali ravishda esdalik sovg‘alari bilan taqdirlandi.