Toshkent derbisi qahramonlaridan biriga aylangan Aleksandr Lobanovning o‘yin haqidagi fikrlaridan bahramand bo‘ling.
- Bu ikki kuchli jamoa o‘rtasidagi keskin to‘qnashuv edi. Biz buni bilardik va shunga yarasha hozirlik ko‘rdik. O‘yin juda yuqori sur’atda o‘tdi. Bellashuvda g‘alaba biz uchun juda muhim edi. Yutuq bizga chempionlik uchun kichik imkoniyatni taqdim etardi. Yakunda g‘alaba qozonganimizdan juda xursandman.
Jamoani gollardan asrab qolganim? Darvozabonlar har bir uchrashuvda buni istashadi. Qachondir bunga erishasan, boshqa paytda esa yo‘q. Bunday o‘yinlarda dastlabki vaziyatga ko‘p narsa bog‘liq. Ilk xavfli zarbani qaytarsang, ishonch paydo bo‘ladi.
Terma jamoaga nomzod ikki darvozabonlar o‘yinini ko‘rdik. Ignatiy juda yaxshi harakat qildi va jamoasini qutqardi. Golda esa jamoa xatoga yo‘l qo‘ydi. Bellashuv birinchi xatogacha borayotgandi.
Stadionda ajoyib muhitni ko‘rdik. Muhimi, to‘rt tribunadan uchtasi "Paxtakor"ga muxlislik qilgani bo‘ldi. Ular bizni ajoyib qo‘llab-quvvatlashdi.
Ishqibozlarning bir olqishi jamoaga qo‘shimcha kuch berib, yanada faol o‘ynashga chorladi. Muxlislardan stadionga kelishni so‘rab qolaman. Ular bilan futbol yanada go‘zallashadi.
