Oliy Liganing 19-turi qoldirilgan o‘yinida “Lokomotiv” “Olmaliq” maydoniga safar uyushtiradi.

Qiziqarli tarzda o‘tishi kutilayotgan mazkur o‘yin oldidan ushbu ikki jamoaning o‘zaro uchrashuvlari tarixi haqida ma’lumot berib o‘tamiz.

Qayd etish joizki, “Lokomotiv” hamda “Olmaliq” jamoalari shu paytga qadar milliy chempionatlarimiz doirasida 17 bor bahs olib borishgan. O‘zaro o‘yinlarda yaqqol ustunlik “temiryo‘lchilar” jamoasi tomonida.

“Lokomotiv” futbolchilari “Olmaliq”ni 11 marta mag‘lub etishning uddasidan chiqishgan. 3 ta o‘yinda raqibga imkoniyat boy berilgan. Yana 3 ta bellashuv durang bilan yakunlangan.

Vakillarimiz olmaliqliklar darvozasini shu paytgacha 39 bor ishg‘ol etishgan va 20 marta o‘z darvozalaridan to‘p o‘tkazib yuborishgan. Diqqatga sazovor jihat shundan iboratki, “Lokomotiv” futbolchilari “Olmaliq”qa qarshi o‘tgan so‘nggi 5ta o‘yinda 20ta gol urishga muvaffaq bo‘lishdi.

Yana bir ma’lumot shundan iboratki, jamoalarning Oliy Liga-2017 birinchi davrasida o‘tkazilgan uchrashuvida ham mamlakatimizning amaldagi chempioni yirik hisobda zafar quchgandi. 4-tur doirasida o‘tgan o‘sha bellashuvda vakillarimiz 5:0 hisobida g‘alabaga erishishgandi. Ushbu g‘alaba “Lokomotiv” uchun “Olmaliq” ustidan qozonilgan eng yirik hisobdagisi bo‘lib turibdi.

«Olmaliq» (Olmaliq) – «Lokomotiv» (Toshkent) - 17:30.

Hakamlar: V. Agishev (Toshkent), R. Nig‘monov (Toshkent), S. Yeremeev (Toshkent), K. Rasulov (Qarshi)

Nazoratchi: S. Ermatov (Toshkent).
PFL vakili: SH. Rajabov.