Shu yilning 15–17 oktyabr kunlari Eronning Tabriz shahrida Markaziy va Janubiy Osiyo mintaqasidan futzal bo‘yicha Osiyo chempionatiga saralash bosqichi bellashuvlari bo‘lib o‘tadi.

O‘zbekiston futzal terma jamoasi “A” guruhidan o‘rin olgan bo‘lib, Osiyo chempionati final bosqichi yo‘llanmasi uchun guruhda Qirg‘iziston, Turkmaniston va Nepal bilan kuch sinashadi. Bugun, 14 oktyabr kuni “A” guruhi vakillarining bosh murabbiylari ishtirokida matbuot anjumani bo‘lib o‘tdi.

Matbuot anjumanida O‘zbekiston milliy terma jamoasi bosh murabbiyi Bahodir Ahmedov va futzalchi Davron Abdurahmonov qatnashdi.  

“Osiyo chempionatiga saralash bosqichi formati oldingilaridan farq qiladi. Avvallari Osiyo chempionatida 1–4 o‘rinlarni egallagan jamoalar to‘g‘ridan-to‘g‘ri OCH final bosqichiga yo‘l olardi. Hozir esa barcha jamoalar guruhlarga bo‘lingan holda final yo‘llanmasi uchun kurashadi va bu o‘ziga yarasha raqobatni kuchaytiradi. Terma jamoamizning tayyorgarligi yaxshi o‘tdi va biz bo‘lajak o‘yinlariga tayyormiz.

Mamlakatimizda futbol va futzalga bo‘lgan e’tibor oshib bormoqda va shuning evaziga ushbu sport turi rivojlanmoqda. Osiyo qit’asidagi barcha jamoalarda o‘ziga yarasha taktika mavjud bo‘lib, ular orasida kuchsizlari yo‘q”,– dedi Bahodir Ahmedov.  

Shundan so‘ng, Nepal, Qirg‘iziston va Turkmaniston terma jamoalari bosh murabbiylari o‘z fikrlari bilan o‘rtoqlashdi.

Rakesh Shresta (Nepal): Saralash bosqichiga tayyor bo‘lib keldik. Bu yerdagi jamoalar katta tajribaga ega, ammo biz Osiyo chempionati final bosqichi yo‘llanmasini qo‘lga kiritish uchun Eronga kelganmiz. Har bir o‘yinda bor kuchimizni beramiz.

Amirjon Mukanov (Qirg‘iziston): Bizning jamoa yangidan shakllanmoqda, ya’ni, avlodlar almashinuvi amalga oshmoqda. Tajribali va mahoratli futzalchilarning yoshi o‘tgani sayin, ularning o‘rnini yoshlar egallamoqda. Shu sababdan Osiyoda o‘z o‘rnimizni biroz yo‘qotdim. Ammo sabrli bo‘lishimiz va yoshlar kuchini sinovdan o‘tkazishimiz zarur. Muvaffaqiyatsizlik sabablarini tahlil qilib, yaqin 3 yil uchun reja tuzib qo‘yganmiz. Barchasi o‘z iziga tushadi degan umiddaman.

Yoqub Ovezov (Turkmaniston): Eronga birinchi kelishimiz emas. Bu yerda terma jamoa bilan o‘quv-mashg‘ulolarida qatnashganmiz. Jamoamiz asosan 23–25 yoshli futzalchilardan iborat. Umid qilamanki, saralash bosqichidan muvaffaqiyatli o‘tib, OCH final bosqichiga yo‘l olamiz.

Eslatib o‘tamiz, O‘zbekiston terma jamoasi OCH saralash bosqichidagi ishtirokini ergata, 15 oktyabr kuni Nepal termasiga qarshi boshlaydi. Musobaqa taqvimi va jadvalini mazkur havola orqali kuzatib borish mumkin.