Madridning “Real” klubi hujumchisi Krishtianu Ronaldu joriy mavsumda o‘ziga “unchalik o‘xshamayapti”. Ya’ni portugaliyalik hujumchi avvalgidek sermahsullik ko‘rsata olmasdan, turli xil tanqidlarga uchramoqda...

Tajribali futbolchi “Real” tarkibida Yevropa chempionlar ligasining 4-turidan o‘rin olgan “Tottenxem”ga qarshi uchrashuv (1:3) dan so‘ng uni savolga tortgan jurnalistga javob o‘rnida noodatiy javob, ya’ni maslahat bilan javob qaytardi.

Jurnalist:

– Ronaldu, nimaga avvalgidek ko‘plab gollar ura olmayapsiz? Buning sababi nimada?

Ronaldu:

– ...Hozir shaxsiy ko‘rsatkichim haqida gapiradigan vaqt emas. Agar mening gol ura olmayotganim yoki ko‘rsatkichlarim bilan qiziqayotgan bo‘lsangiz, marhamat qilib “Google”ga kiring va “Krishtianu Ronalduning gollari” deb qidirib ko‘ring!

Sizga maslahatim shuki, shubhasiz bu savolga javobni o‘sha yerdan topasiz! Gol ura olmayotganim esa hozircha meni qiziqtirmayapti... Hattoki bundan bezovta bo‘layotganim ham yo‘q.

Savol bergan jurnalist o‘zining noo‘rin savolini sezdimi yoki bunday javob kutmaganmidi, karaxt holatda jimib qoldi...

“..Biz “Tottenxem”ga qarshi yaxshi o‘ynadik! Faqat biroz omad yetishmadi... O‘yin natijasi esa faqat gollar, gollar va yana gollar bilan hisobga olinadi”, deya qo‘shimcha qildi Krishtianu.

Ma’lumot uchun, 32 yoshli hujumchi joriy mavsum “Real” futbolchisi sifatida barcha musobaqalarda 12 marta maydonga tushib, 8 ta gol urgan. Ispaniya chempionati bahslarida esa faqat bir gol muallifiga aylangan.

Eslatib o‘tamiz, Krishtianu Ronaldu mavsum boshida “Barselona”ga qarshi o‘tgan Ispaniya super kuboki doirasidan o‘rin olgan dastlabki bahsda hakamni turtgani uchun 4 ta va ikkinchi bora ogohlantirilgani uchun 1 ta o‘yinga chetlatilgani haqida xabar bergandik.

Akmalxon Eshonxonov