"Real" va "Yuventus" klublari sobiq futbolchisi hamda hozirda "Chelsi" sharafini himoya qilayotgan Alvaro Morata "qaymoqranglilar" forvardi Krishtianu Ronaldu uchun gol urish qanchalik muhimligini aytib o‘tdi.
Portugaliyalik futbolchi La liga 11-turi doirasida "Las-Palmas"ga (3:0) qarshi kechgan bahsda ham gol ura olmadi. U Iskoning goliga hammuallif bo‘ldi, biroq raqib darvozasi ishg‘ol qilingandan so‘ng golni xursandchilik bilan nishonlamagan va bu ko‘plab bahs-munozaralarga sabab bo‘lmoqda.
"Bu Ronaldu haqida ko‘p narsani aytib beradi. Balki, bu holatni tashqaridan ko‘rayotgan va futbolchi bo‘lmagan odam uni nohaq sanashi mumkin. Ammo u unday emas va aynan mana shunday sifatlari bilan Krishtianu futbol tarixidagi eng yaxshilar qatoriga kira oldi.
Uning asabiylashayotgani tabiiy hol, chunki u har bir o‘yinda 3-4 ta gol urishga o‘rgangan, bu yerda esa birorta ham urolmadi. Ronaldu jamoaning g‘alabalarida quvonadi, biroq u gol urishni sevadi va uning baxti ham shunda. Men ham ba’zida shunday holatni boshdan kechiraman, lekin bunchalik darajada emas", — deydi Morata.
