“Manchester Yunayted”ning sobiq tarjimoni Di Mariya bilan bog‘liq qiziq holatni gapirib berdi. Debor Gomesning fikricha, argentinalik futbolchi “Manchester Yunayted”ga iqtisodiy sabab tufayli o‘tgan ekan.
“Men klub rahbariyatidan “Di Mariyani xarid qilsak, ko‘proq futbolka sota olamiz”, degan gapni eshitgandim. Ayni shuning uchun Di Mariya keyinchalik norozi bo‘lgandi. U klubga moslashib keta olmadi. Birinchidan, jamoada hech kim bilan til topisha olmagan bo‘lsa, ikkinchidan, keyinroq ko‘proq futbolka sotish uchun xarid qilinganini fahmlab qoldi”, deydi Debor Gomes.
“Qizil iblislar” Di Mariyani 2014 yilda 75 mln yevroga xarid qilishgandi. Di Mariyaning futbolkalari 2014-2015 yilgi mavsumda ancha muvaffaqiyatli sotildi, u umumiy bozorning 9,59 foizini band qildi.
