“Neftchi” hamda “Mash’al” jamoalari  o‘rtasidagi bahsdan so‘ng “Neftchi” futbolchilari qisqa ta’tilga chiqishdi. Fursatdan foydalangan holda, jamoa yarim himoyachisi Muzaffar Muzaffarov bilan bog‘lanib undan intervyu oldik.

– Mavsum davomida deyarli barcha o‘yinlarda to‘liq ishtirok etdim, – deb gap boshladi Muzaffar. – Shu sababli balki “Mash’al”ga qarshi bahsda charchoq alomatlari sezilgandir. Lekin nima bo‘lgan taqdirda ham joriy mavsumdagi so‘nggi uy bahsida muxlislarga g‘alabani taqdim etdik. Men shundan xursandman. Muborakliklarga qarshi bahsda omad biz tarafda bo‘ldi. Bu  futbol. Unda kimdir g‘alaba qozonsa, kimdir mag‘lub bo‘lishga majburdir.     

Uchrashuvda yosh jamoadoshimiz Avazbek O‘lmasaliyev bahs taqdirini hal qiluvchi golga mualliflik qildi. Avazbek iqtidorli futbolchi sanaladi.  Uni kelajakda yaxshi saviyali o‘yinchi bo‘lib yetishib chiqadi degan fikrdaman. Balki vaqti  kelib uni xorij chempionatlarida ham ko‘rarmiz.  Avazbekka omad tilayman.

Shu o‘rinda farg‘onalik muxlislarga rahmat aytib qolmoqchiman. Ular bizni qiyin paytlarda ham yolg‘izlatib qo‘yishmadi. Barchasi uchun rahmat, – dedi Muzaffar Muzaffarov.