“Erudit SPORT” nashri quyida tomoshabop o‘tishi kutilayotgan to‘qnashuvlarni o‘tkazib yubormaslikni tavsiya qiladi:
“Atletik” – “Real” Madrid
2 dekabr, shanba, soat: 00:45
TV-translyasiya: «UzReport TV»
O‘zaro uchrashuvlar:
51 G‘ALABA 32 DURANG 89 G‘ALABA
So‘nggi uchrashuv: “Atletik” – “Real” Madrid 1:2 va 1:2
Imkoniyat: 30/30/40
Jamoalarning transfer qiymati:
“Atletik” – “Real” Madrid
170,60 million yevro VS 743,80 million yevro
O‘yin haqida ikki og‘iz:
“Atletik”ka Ernesto Valverde javob berganida “Sherlar” kamida Yevropa ligasiga yo‘llanma taqdim etuvchi o‘rinlarni egallab turgan. Murabbiy Xose Anxel Siganda qo‘l ostida omadi yurishmayapti: to‘qqiz o‘yinda 24 ochko yo‘qotdi va o‘n beshinchi o‘ringa ravona bo‘ldi. Bundan tashqari, vaziyatlar realizasiyasi, qanotlarni “yopish” va yakka kurashlarda muammoga uchrayapti. Faqat bir ko‘rsatkichda – “ikkinchi qavatda”gi kurashlarda “Basklar”ga yetadigani yo‘q. Eng qizig‘i “Real” Madridning havodagi kurashlarda omadi chopmayapti (eng yomon uchinchi natija). “Qirollik klubi”ni iziga qaytarish ustida bosh qotirayotgan Zidanni qiynayotgan muammo birgina bu emas. Golli vaziyat yaratishda Primerada “Real”ning oldiga tushadigani yo‘q, ammo o‘sha imkoniyatlarni ko‘kka sovurishda ham madridliklar eng oldi jamoa. Xullas, to‘rt turdan buyon uch ochko nimaligini bilmaydigan “Atletik” hamda La liga karvonboshisidan o‘n ochko ortda borayotgan “Real” o‘rtasidagi kurash tomoshabop o‘tadi.
“Uotford” – “Tottenxem”
2 dekabr, shanba, soat: 20:00
TV-translyasiya: «Futbol 2»
O‘zaro uchrashuvlar:
5 G‘ALABA 3 DURANG 12 G‘ALABA
So‘nggi uchrashuv: “Uotford” – “Tottenxem” 0:4 va 1:4
Imkoniyat: 30/35/35
Jamoalarning transfer qiymati:
“Uotford” – “Tottenxem”
150 million yevro VS 551 million yevro
O‘yin haqida ikki og‘iz:
Bir qarashda “Tottenxem” “Qizil arilar”ga qarshi matchda ortiqcha muammoga uchramaydigandek taasurot uyg‘otadi. Chunki o‘ttiz ikki yildir-ki “Uotford”ga yengilmaydi. Lekin ayni damda “Sariq armiya” Marku Silva degan “general” boshchiligida grandlarni “talon-toroj” qilmoqda. “Uotford” mutasaddilari portugal murabbiyining boshidan suv o‘girib ichishga tayyor. Axir, jamoa so‘nggi yetti o‘yinning oltitasida ikkitadan kam gol urmayapti. Yana “Liverpul” va “Arsenal” ustozlari ham hamkasbi oldida “shlyapasini yechdi” (to‘rt ochko ishladi). Boshqa tomondan, mahalliy muxlislar Pochettinoni “Uotford” sovuniga “kir yuvishini” kutmoqda. O‘zaro uchrashuvlarda, ayniqsa, o‘tgan mavsumda “Taqachilar” raqibini “sochib tashlagandi”. Murabbiy Maurisio ham sezib turibdi: raqib ochko ulashadigan emas, ochko oladigan jamoaga aylangan. Shu kuni “Tottenxem” vakillari maydon egalarining himoyasidagi bo‘shliqlardan foydalanishga urinsa, “Uotford” “ikkinchi qavatda”gi kurashlardagi ustunlikka urg‘u beradi.
“Arsenal” – “Manchester Yunayted”
2 dekabr, shanba, soat: 22:30
TV-translyasiya: «Futbol TV»
O‘zaro uchrashuvlar:
60 G‘ALABA 43 DURANG 73 G‘ALABA
So‘nggi uchrashuv: “Arsenal” – “Manchester Yunayted” 1:1 va 2:0
Imkoniyat: 35/30/35
Jamoalarning transfer qiymati:
“Arsenal” – “Manchester Yunayted”
508 million yevro VS 592,75 million yevro
O‘yin haqida ikki og‘iz:
Qachon-qarama sharoitidan noliydigan Mourinyo “To‘pchilar”ning taqvimidan norozi bo‘lgandi. Endi “Emireyts”da “Arsenal”ning qarshiligini sindirishiga to‘g‘ri keladi. 1152-o‘yinga hozirlik ko‘rayotgan Arsen Venger esa pinagini buzgani yo‘q. Klub oltinchi o‘rindan nariga o‘tolmayotganiga qaramay, o‘z uyida raqiblarini “patini yulyapti”: olti o‘yin va o‘n sakkiz ochko. Umuman, maydonidagi mag‘lubiyatsiz o‘yinlar seriyasi 11 uchrashuvga yetgan. Qolaversa, mehmonlarni kamida ikki gol bilan siylashi odat tusiga kirdi (9 bahsdan buyon). O‘z navbatida, “Manchester Yunayted” raqib maydonida ochko yo‘qotadigan odat chiqargan. Hatto Premyer liganing “Uotford” va “Barnli” kabi o‘rtamiyona ishtirokchilari “Mankunianlar”ga qaraganda ko‘proq ochko qo‘lga kiritgan. Bir vaqtning o‘zida “Yunayted”ning London klublariga qarshi natijalari chakki emas: to‘rt to‘qnashuv va to‘qqiz ochko. Qiziq, Joze janoblarining beshinchi urinishi qanday tugaydi?
Ulug‘bek RAHMONQULOV, «Erudit SPORT» gazetasi.
