Barchangizga ma’lumki O‘FF  yangi mavsumda jamoalar oldiga bir qator qat’iy talablarni qo‘ygan. Shunday talablardan biri har bir klub  xotin-qizlar  futbol  jamoasiga ega bo‘lishi shartligi ko‘rsatilgan.

Bu borada bizning jamoamiz ham  tinmay izlanishda davom etmoqda.Biz Qo‘qonda xotin-qizlardan iborat futbol jamoasi tuzilganligi haqida sizlarga xabar bergan edik.  

Mirsaid Mirolimov murabbiylik qilayotgan bu jamoa asosan mahalliy yoshlardan iborat bo‘lib, hali bu jamoaga xotin-qizlarni tanlab olish davom etmoqda.

Bugun  “Qo‘qon-1912”  futbol klubi qoshida tashkil etilgan xotin-qizlar jamoasi o‘zining dastlabki nazorat uchrashuvini o‘tkazdi.

Raqib sifatida “Qo‘qon-1912” futbol maktabining 2002-2003 yillarda tug‘ilgan o‘g‘il bolalari  tanlab olindi. Aytish joizki Mirolimov  jamoasidagi futbolchilar asosan 1998-2002 yillarda tug‘ilgan qizlardan iborat.

Qiziqarli va gollarga boy o‘tgan uchrashuv 6-4 hisobida qizlarimizning g‘alabasi bilan yakunlandi.

Uchrashuvda Gulzoda G‘ulomqodirova, Vazira Mirzakamolova , Gulira’no Hasanovalar o‘zlarining chiroyli o‘yinlari va kiritgan gollari bilan mutaxasislarda yaxshi taassurot qoldirishdi.

Nazorat uchrashuvini “Qo‘qon-1912”  futbol klubi vise-prezidenti B Tolipov boshchiligidagi  jamoa  rahbariyati kuzatib borishdi.