Xabaringiz bor, Kuala-Lumpur shahrida 2018 yilgi Osiyo Chempionlar Ligasi musobaqasi guruh bosqichiga qur’a tashlash marosimi bo‘lib o‘tdi.
O‘zbekiston chempioni hamda mamlakat Kubogi sohibi “Lokomotiv” klubi G‘arb mintaqasida “B” guruhidan joy oldi. Jamoa guruh bosqichida “Duhail” (Qatar), “Al Vahda” (BAA) hamda “Zobohan” (Eron) / “Aizavl” (Hindiston) juftligi g‘olibiga qarshi bahs olib boradi.
"Temiryo‘lchilar" jamoasi himoyachisi Islom To‘xtaxo‘jayev mazkur guruh haqida o‘z fikrlarini bildirib o‘tdi:
- Qur’a jarayonini kuzatib bordim. Zero jamoamizga qur’a qanday raqiblar taqdim etishi barchamiz uchun qiziqarli edi. Ishonch bilan ayta olamanki, qur’adan ko‘nglim to‘ldi. To‘g‘ri, guruhimizga biz uchun u qadar tanish bo‘lmagan jamoalar tushdi. Barcha klublar bilan o‘yinlar qiziqarli o‘tishiga aminman, - dedi mahoratli futbolchi.
