Avval xabar berilganidek, shu kunlarda O‘zbekiston Futbol Federasiyasining sun’iy qoplamali maydonida 2001 yilda tug‘ilgan o‘smirlar o‘rtasida O‘zbekiston Futbol Federasiyasi Kubogi musobaqasi bo‘lib o‘tmoqda.

Musobaqada jami 8ta jamoa (“Lokomotiv”, “Paxtakor”, “Bunyodkor”, “Spartak”, “Nasaf”, “Mash’al”, “Andijon” FMI, “Neftchi") ikki guruhga bo‘lingan holda qatnashyapti.

O‘FF Kubogi musobaqasini o‘tkazishdan asosiy maqsad yangi tashkil etiladigan O‘zbekiston U-19 terma jamoasi uchun nomzodlarni saralab olishdan iborat bo‘lib, O‘FF Texnik rivojlantirish boshqarmasi seleksionerlari Shukrullo Ashirov, Akmal Qoraboyev va Botir Karimjonovlar turnirni diqqat bilan kuzatib borishmoqda.

Ular musobaqa davomida o‘zini yaxshi tomonlama ko‘rsatishga muvaffaq bo‘lgan yosh futbolchilarni tanlab olib, murabbiylar shtabiga tavsiya etishadi.