Shu yilning 18 dekabr kuni bolalar futboli bo‘yicha serbiyalik mutaxassis Zavisha Milosavlevich poytaxtimizga tashrif buyurgani haqida avval xabar berib o‘tgandik.
U O‘FF prezidenti Umid Ahmadjonov bilan uchrashib, mamlakatimizda bolalar futbolini rivojlantirish bo‘yicha o‘zining dasturini taqdim etdi.
Zavisha Milosavlevichning dasturi O‘FF rahbariyatiga ma’qul kelsa, u 3-hudud hisoblangan vodiyda (Andijon, Farg‘ona, Namangan viloyatlarida) ish olib boradi.
Zavisha Milosavlevich hududlardagi bolalar futboli murabbiylari bilan uchrashish, u yerdagi holatni o‘rganish maqsadida, Andijon shahriga jo‘nab ketgandi.
Serbiyalik mutaxassis Andijonda bolalarning futbol bilan shug‘ullanishi uchun yaratilgan shart-sharoitlar bilan yaqindan tanishdi. Futbol maktablari tarbiyalanuvchilari bilan uchrashib, o‘z tajribalari bilan o‘rtoqlashdi.SHuningdek, bolalar futboli bo‘yicha ish olib borayotgan murabbiylarga o‘z dasturini taqdim etdi.
Shuningdek, bugun bolalar futboli bo‘yicha ispaniyalik mutaxassis, "Real Madrid" akademiyasida faoliyat yuritgan Kiko Zuniga poytaxtimizga tashrif buyuradi. U kun davomida O‘FF rahbariyati bilan uchrashib, yurtimizda bolalar futbolini rivojlantirish bo‘yicha o‘z dasturini taqdim etishi rejalashtirilgan.
