Шу йилнинг 18 декабрь куни болалар футболи бўйича сербиялик мутахассис Завиша Милосавлевич пойтахтимизга ташриф буюргани ҳақида аввал хабар бериб ўтгандик.

У ЎФФ президенти Умид Аҳмаджонов билан учрашиб, мамлакатимизда болалар футболини ривожлантириш бўйича ўзининг дастурини тақдим этди.

Завиша Милосавлевичнинг дастури ЎФФ раҳбариятига маъқул келса, у 3-ҳудуд ҳисобланган водийда (Андижон, Фарғона, Наманган вилоятларида) иш олиб боради.

Завиша Милосавлевич ҳудудлардаги болалар футболи мураббийлари билан учрашиш, у ердаги ҳолатни ўрганиш мақсадида, Андижон шаҳрига жўнаб кетганди.

Сербиялик мутахассис Андижонда болаларнинг футбол билан шуғулланиши учун яратилган шарт-шароитлар билан яқиндан танишди. Футбол мактаблари тарбияланувчилари билан учрашиб, ўз тажрибалари билан ўртоқлашди.Шунингдек, болалар футболи бўйича иш олиб бораётган мураббийларга ўз дастурини тақдим этди.

Шунингдек, бугун болалар футболи бўйича испаниялик мутахассис, "Реал Мадрид" академиясида фаолият юритган Кико Зунига пойтахтимизга ташриф буюради. У кун давомида ЎФФ раҳбарияти билан учрашиб, юртимизда болалар футболини ривожлантириш бўйича ўз дастурини тақдим этиши режалаштирилган.