Yashash nash’asidan qilar bahramand,
Tomoshaning zavqi, sururi ajib.
Futbol shousining kechinmasi zo‘r -
Ko‘ngillarga yayrash etmoqda nasib.
Bahslardan olasiz o‘zgacha maroq,
Nashidasi bo‘lak tungi futbolning.
Ko‘zni ham, dilni ham quvontirgan payt
Sehrini anglaysan ajoyib golning.
Muxlislar ko‘pincha fol ochar, ammo,
Bashoratlar chiqar aslidan yiroq.
To‘g‘ri, taxminlarga ishqibozlar o‘ch,
Futbolning o‘z hukmi mavjuddir biroq.
Millionlar qalbini rom etgan futbol,
Qudratli zaminda fanatlari ko‘p.
Yanada yuksalsin futbol parvozi -
Uning muxlislari - qanotlari ko‘p!
Zayniddin NORMAN