Avval, xabar berganimizdek, kecha AGMK jamoasi tarkibiga yana ikki nafar legioner kelib qo‘shildi.
Mashg‘ulotlarni boshlashdan avval Vladislav Kasminin tavallud ayomi bilan tabrik qabul qildi. Shundan so‘ng, jamoaga kelib qo‘shilgan bosniyalik hujumchi Ismar Tandir futbolchilarga tanishtirildi.
Ismar Tandir 1995 yil Germaniyaning Frankfurt shahrida tavallud topgan. Hozirda Bosniya va Gersegovina fuqarosi bo‘lgan forvard 2017 yilgi mavsumda Tuzla shahrining "Sloboda" jamoasi sharafini himoya qilgan.
Kechki mashg‘ulotlarga esa Qirg‘iziston terma jamoasi darvozaboni Pavel Matyash jamoa tarkibida shug‘ullana boshladi.
2017 yil Maldiv chempionatida g‘olib bo‘lgan posbon AGMKda darvozabonlar o‘rtasidagi raqobatni oshirish maqsadida taklif etildi.
O‘tgan mavsum jamoamizning yutuqlariga katta hissa qo‘shgan Xurshid Xodjayev o‘tgan seshanba kuni Moskva shahrida tizzasidan jarrohlik amaliyoti o‘tkazdi. Jarrohlik amaliyoti yaxshi o‘tdi va shifokorlar Xurshidga ikki oydan so‘ng individual mashg‘ulot olib borishi mumkin ekanligini ta’kidlashdi.
