Oldinroq xabar berganimizdek, ayni paytda Belgiya futbol federasiyasi texnik bo‘limi rahbari Kris van Puyvelde yurtimizda bo‘lib turibdi.

Bugun ushbu mehmon yurtimizning yetakchi klublariga tashrif buyurdi. Jumladan, u “Bunyodkor” futbol klubi va stadioni faoliyati bilan ham yaqindan tanishdi.

Belgiyalik mehmonni “Bunyodkor” futbol klubi bosh direktori Murodjon Aliyev hamda stadion direktori Vohid Zokirov iliq kutib olishdi. Kris van Puyvelde avvaliga “Bunyodkor” stadionida yaratilgan sharoitlar bilan tanishdi va ularga yuksak baho berdi. So‘ng, mehmon “Bunyodkor” bolalar-o‘smirlar futbol maktabi holati bilan yaqindan tanishishish maqsadida akademiyaga tashrif buyurdi. Yevropalik mutaxassis futbol maktabi o‘quv binosi, qayta tiklanish va tibbiyot markazlari, suzish xavzasi, ovqatlanish tizimi, yotoqxona, trenajyor va gimnastika zallari, mashg‘ulot maydonlarini ko‘zdan kechirdi va yaratilgan sharoitlarga xavas bilan qaradi.

Shuningdek, klub faoliyatini yanada takomillashtirish bo‘yicha o‘z maslahatlari bilan ham o‘rtoqlashdi.