Yurtimizda tashrif bilan bo‘lib turgan Belgiya futbol federasiyasi Texnik direktori Kris van Puyvelde bugun poytaxtimiz klublariga tashrif buyurdi.
Belgiyalik mutaxassis dastlab "Lokomotiv" stadioni va klub qarorgohida bo‘lib, u yerda futbolchi va murabbiylar uchun yaratilgan shart-sharoitlar, "Lokomotiv" futbol klubining ish faoliyati bilan yaqindan tanishdi. Suhbat davomida u klub infratuzilmasini yanada rivojlantirish, stadionga muxlislar tashrifini oshirish, yosh futbolchilarni tarbiyalash tizimini yanada takomillashtirish bo‘yicha o‘z taklif va tavsiyalarini berdi.
Shundan so‘ng, Kris van Puyvelde “Bunyodkor” futbol klubiga tashrif buyurib, ushbu klub faoliyati bilan ham yaqindan tanishdi.
Belgiyalik mehmonni “Bunyodkor” futbol klubi mutasaddilari iliq kutib olishdi. Kris van Puyvelde avvaliga “Bunyodkor” stadionida yaratilgan sharoitlar bilan tanishdi va ularga yuksak baho berdi. So‘ng, mehmon “Bunyodkor” bolalar-o‘smirlar futbol maktabi holati bilan yaqindan tanishishish maqsadida akademiyaga tashrif buyurdi. Yevropalik mutaxassis futbol maktabi o‘quv binosi, qayta tiklanish va tibbiyot markazlari, suzish havzasi, ovqatlanish tizimi, yotoqxona, trenajyor va gimnastika zallari, mashg‘ulot maydonlarini ko‘zdan kechirdi va yaratilgan sharoitlarni yuqori baholadi.
Shuningdek, Kris van Puyvelde klub faoliyatini yanada takomillashtirish bo‘yicha o‘z maslahatlari bilan ham o‘rtoqlashdi.
Keyin esa belgiyalik mutaxassis "Paxtakor" klubiga tashrif buyurib, bu yerdagi shart-sharoitlarni ham ko‘zdan kechirdi. "Paxtakor" klubi mutassaddilari Kris van Puyveldeni klub faoliyati bilan tanishtirib, unga "Paxtakor" stadionini ko‘rsatishdi.
