Bugun, 18 yanvar kuni Xalqaro futbol federasiyasi (FIFA) tashkilotga a’zo terma jamoalarning yangilangan reytingini e’lon qildi.

Unga ko‘ra, O‘zbekiston milliy terma jamoasi 441 (440,74) ochko bilan 77-pog‘onaga joylashdi. Terma jamoa avvalgi ko‘rsatkichga nisbatan umumiy hisobda bir o‘ringa yuqoriladi va OFKga a’zo mamlakatlar orasida 9-o‘rinda qoldi.

Yangi reytingga nazar soladigan bo‘lsak, O‘zbekiston BAA va Iroq terma jamoasidan oldinga o‘tib ketdi. O‘zbekiston va BAA o‘rtasidagi tafovut 5 ochkoni tashkil etadi. Eron terma jamoasi 797 ochko bilan hamon Osiyo qit’asida peshqadamlik qilmoqda.

Kuchli uchlikdan Avstraliya (763) va Yaponiya (598) terma jamoalari joy olishdi. Shuningdek, Falastin terma jamoasi birdaniga 5 ta o‘ringa ko‘tarilib, O‘zbekistonni ortda qoldirib ketdi.

Quyida OFKga a’zo mamlakatlarning TOP-10 ligi bilan tanishishingiz mumkin.

1 (34). Eron — 797 ochko;

2 (36). Avstraliya — 763 ochko;

3 (56). Yaponiya — 598 ochko;

4 (59). Janubiy Koreya — 569 ochko;

5 (65). Saudiya Arabistoni — 522 ochko;

6 (71). Xitoy — 443 ochko;

7 (75). Falastin —  443 ochko;

8 (76). Suriya — 442 ochko;

9 (77). O‘zbekiston — 441 ochko;

10 (78). BAA — 436 ochko.

Germaniya terma jamoasi 1602 ochko bilan FIFA reytingida hamon peshqadam bo‘lib turibdi. Braziliya 1483 ochko bilan ikkinchi o‘rinni egallagan bo‘lsa, kuchli uchlikni Portugaliya terma jamoasi 1358 ochko bilan yakunlab berdi.