O‘zbekiston olimpiya terma jamoasi Xitoyda bo‘lib o‘tayotgan 23 yoshgacha bo‘lgan futbolchilar o‘rtasidagi Osiyo chempionatida ertaga yarim final bahsini o‘tkazadi. Vakillarimizga Janubiy Koreya termasi raqiblik qiladi. Mazkur o‘yin oldidan Ravshan Haydarov o‘z fikrlarini bildirib o‘tdi.

"Shukrki, tarkib borasida muammolarimiz yo‘q. Barcha futbolchilar ertangi bahsga tayyor. Jismoniy, taktik va ruhiy jihatdan Janubiy Koreyaga qarshi o‘yinga tayyormiz. Umid qilaman, ertaga eng yaxshi o‘yinimizni namoyish qilamiz", — so‘z boshladi Ravshan Haydarov.

"O‘zbekiston va Janubiy Koreya terma jamoalari mazkur musobaqa doirasida 4tadan o‘yin o‘tkazishdi. Shu bois, har ikkala jamoa bir xil holatda. To‘rtta o‘yindan keyin ba’zi futbolchilardan charchoq alomatlari bor. Ammo murabbiylar shtabi buning ustida ishlamoqda".

O‘zbekiston olimpiya terma jamoasi chorak finalda Yaponiya ustidan yirik 4:0 hisobida g‘alaba qozondi. Haydarovning fikricha, bunday natija Koreyaga qarshi bahs oldidan futbolchilarning ruhiy holatiga ijobiy ta’sir ko‘rsatadi.

"Yaponiyaga qarshi o‘yinda qozonilgan g‘alaba ruhiy jihatdan bizga yordam beradi. Lekin koreyaliklar qay darajada kuchli ekanini yaxshi bilamiz. Umid qilaman, ertaga Yaponiyaga qarshi bahsda bo‘lgani kabi harakat qilamiz. Janubiy Koreya jismoniy jihatdan kuchli ekanini bilamiz. G‘alaba qozonish uchun qo‘ldan kelgan barcha ishni qilamiz" — dedi Ravshan Haydarov.

Janubiy Koreya terma jamoasi musobaqadagi barcha o‘yinni Kunshan stadionida o‘tkazishdi va ular bu maydonga to‘la moslashib ulgurishgan. O‘zbekiston esa avvalgi bahslarni Chanchjou va Szyanmin shaharlarida o‘tkazgandi.

"Koreya barcha o‘yinlarni bu stadionda o‘tkazib, ular maydonga moslashib olishgan bo‘lishi mumkin. Ammo har ikkala jamoa bir xil holatda. Boisi, barchamiz Xitoyda o‘ynayapmiz. Shu bois, bu narsa biz uchun muammo bo‘lmasligi kerak".