Eron milliy terma jamoasi bosh murabbiyi Karlush Keyrush terma jamoa bilan shartnomasini uzaytirishi mumkin. Bu haqda terma jamoalar departamenti rahbari Mahdiy Xorotiy gapirib o‘tgan. 

Xorotiyning aytishicha, Eron futboli rahbariyati bosh murabbiy Karlush Keyrush bilan yangi shartnoma imzolash uchun tayyorgarlik boshlab yuborgan.

«Futbol federasiyamiz rahbari va terma jamoa bosh murabbiyining munosabatlari juda yaxshi. Yangi shartnoma imzolash uchun vaziyat qulay, tomonlar unga xayrixohlik bildirmoqda», - deb Xorotiy so‘zlarini keltirmoqda Eron futbol federasiyasi sayti. 

«Biz bosh murabbiy bilan shartnomani uzaytirmoqchimiz, Federasiya rahbari shu haqda topshiriq berdi. Har xil mish-mishlarga qaramay, Federasiya rahbari va milliy terma jamoa ustozi o‘zaro hamkorlikni uzaytirish va terma jamoani yanada kuchaytirish rejalariga ega. Muxlislarning talabi ham shu. Bundan tashqari, JCH-2018 musobaqasida ham muvaffaqiyatli ishtirok etmoqchimiz» - deb qo‘shimcha qildi Xorotiy.

Eslatib o‘tamiz, oldinroq, Karlush Keyrush O‘zbekiston terma jamoasini boshqarishi haqida xabarlar tarqalgandi. Unga ko‘ra, portugaliyalik mutaxassis JCH-2018 musobaqasidan so‘ng O‘zbekiston terma jamoasi boshqaruvini qo‘lga olishi lozim edi.