Shu yilning 6 mart kuni Malayziya poytaxti Kuala-Lumpurda Olimpiya terma jamoalari bosh murabbiylari uchun OFKning 1-konferensiyasi boshlandi.
Ushbu Konferensiyada FIFAning Murabbiylar va futbolchilar tayyorlash boshqarmasi boshlig‘i Branimir Ujevich, OFK Texnik direktori Endji Roksburg hamda Osiyo mamlakatlari Olimpiya terma jamoalari bosh murabbiylari ishtirok etishmoqda.
O‘zbekiston nomidan mazkur konferensiyada Ravshan Haydarov va Islom Ahmedov qatnashyapti.
Konferensiyada shu yilning yanvar oyida Xitoyda o‘tkazilgan U-23 Osiyo chempionati tahlil qilindi. O‘zbekiston Olimpiya terma jamoasining muvaffaqiyati konferensiya ishtirokchilari tomonidan yuksak baholandi. Ravshan Haydarov mazkur musobaqaga tayyorgarlik jarayoni, o‘yin uslublari va taktik o‘zgarishlar haqida yig‘ilganlarga ma’ruza qilib berdi. Shundan so‘ng O‘zbekiston OTJning Osiyo chempionatidagi g‘alabasiga bag‘ishlangan videorolik yig‘ilganlarga namoyish qilindi.
Konferensiya 8 martga qadar o‘z ishini davom ettiradi. Unda Tokioda bo‘ladigan Olimpiada o‘yinlariga tayyorgarlik masalalari ham muhokama qilinishi ko‘zda tutilgan.
