“Xemel Xempsted Taun» va «Ist Tarrok Yunayted» jamoalari o‘rtasidagi o‘yinda qiziq holat yuz berdi.

BBCning xabar berishicha, o‘yin vaqtida hakam “Xemel Xempsted Taun» futbolchisi Sanches Uottga sariq kartochka ko‘rsatishga qaror qiladi va buni qayd etib qo‘yish uchun futbolchining familiyasini so‘raydi. Sanches familiyasini aytadi, hakam esa buni “Futbolchi “Nima?” deb so‘rayapti va men bilan bahslashyapti”, deb o‘ylaydi (Watt so‘zining talaffuzi inglizcha “what” bilan deyarli bir xil, bu so‘zning tarjimasi — “nima?”) hamda futbolchiga to‘g‘ridan-to‘g‘ri qizil kartochka ko‘rsatadi. Ammo shu zahoti Sanchesning sheriklari hakamga vaziyatni tushuntirishgach, hakam xatosini tan oladi va qarorini bekor qiladi.

Ma’lumot uchun, Sanches Uott faoliyatini 2009 yilda “Arsenal”da boshlagan.