O‘zbekiston futbol assosiasiyasi tomonidan yurtimizdagi hakamlar saviyasini oshirish va futbol uchrashuvlarini sifatli boshqarilishini ta’minlash maqsadida bir qator chora-tadbirlar amalga oshirilmoqda.

Bugun ana shu maqsadda “Bunyodkor” stadionida Superliga hakamlari ishtirokida yig‘ilish bo‘lib o‘tdi. Yig‘ilishda Superliganing 3ta turi davomida hakamlar tomonidan yo‘l qo‘yilgan xato va kamchiliklar tahlil qilindi.

Yig‘ilishda O‘zbekiston futbol assosiasiyasi Hakamlar va nazoratchilar bo‘limi boshlig‘i Ma’mur Saidqosimov, FIFA referisi Ravshan Ermatov va FIFA instruktori Farhod Abdullayev yig‘ilganlarga hakamlar tomonidan Superliga uchrashuvlarida yo‘l qo‘yilgan xatolarni namoyish qilib, kelgusi uchrashuvlarda bu kabi xatolarning oldini olish va hakamlik borasida kamchiliklarga yo‘l qo‘ymaslik borasida amalga oshirilishi kerak bo‘lgan zarur chora-tadbirlar haqida so‘z yuritishdi.

Kunning ikkinchi qismida Superliga hakamlari uchun maydonda turli bahsli vaziyatlar yaratildi. Hakamlar esa bu vaziyatlar bo‘yicha qarorlar chiqarishdi. Barcha jarayon videotasvirga olinib, keyin hakamlarga sekinlashtirilgan holda vaziyatlar namoyish qilindi. Har bir hakam qaror chiqarish jarayonida yo‘l qo‘ygan kamchiliklarini ko‘rib, o‘zi uchun tegishli xulosalar chiqarib oldi.

Bu kabi yig‘ilishlar mavsum davomida muntazam ravishda o‘tkazib borilishi rejalashtirilgan.