O‘zbekiston – Keniya (1:0) bahsidan so‘ng o‘tkazilgan matbuot anjumanida o‘zbekistonliklar bosh murabbiyi Ravshan Haydarov va himoyachi Doston Tursunov ishtirok etishdi.

"Vodiyda 2ta ajoyib bahsga guvohi bo‘ldik. Jamoamiz uchun ancha foydali bo‘lgan bellashuvlarni kuzatdik. Mana shunday o‘yinlarni tashkil qilib bergan O‘FA rahbariyatiga jamoa nomidan rahmat deyman. Shu qatori bizning taklifimizga rad javobini bermasdan, O‘zbekistonga kelgan keniyaliklarga ham o‘z minnadorchiligimni bildiraman. Birinchi marta Afrika termalaridan biri bilan o‘ynadik. Bu katta tajriba maktabi bo‘ldi. Boshqa o‘yinda bunday muhitni topish qiyin deb o‘ylayman. Keniya OTJ menga juda yoqdi.

Uchrashuv borasida gapiradigan bo‘lsam, o‘yinni nazorat qilib bordik va chiroyli futbol namoyish etdik. Tarkibdagi o‘zgarishlar ham bahsni kuchaytirdi. Andijondagi o‘yinda yo‘l qo‘yilgan xatolarni takrorlamaslikka intildik. Shogirdlarimning o‘yinidan qoniqdim. Yana bir narsani alohida e’tirof etmoqchiman, bizning asosiy vazifamiz milliy terma jamoamizga o‘yinchi yetkazib berish hisoblanadi. Shu o‘rinda, “Istiqlol” stadionidagi ajoyib tashkilotchilik uchun ham farg‘onaliklarga katta rahmat aytib qolaman", - dedi Haydarov.

"G‘alaba uchun oxirigacha harakat qildik. Murabbiylarning ko‘rsatmalariga amal qilganimiz ancha foyda keltirdi. Birinchi o‘yinda biroz natijalar o‘xshamadi. Chunki tarkibda yangi futbolchilar ko‘p edi. Farg‘onadagi ikkinchi o‘yingacha jamoa yanada jipslashdi. Keniya ham yaxshi jamoa ekan. Ikkinchi bo‘lim oxirida jamoaviy hujumga o‘tdik va bu o‘z samarasini berdi", — dedi Doston Tursunov.

“Neftchi” matbuot kotibi Hojiakbar Jabborov yozib oldi.