Futbolimiz yangicha taraqqiyot yo‘liga tushib olganidan xursandmiz, albatta. Mana, Superliga o‘yinlari shiddat bilan boshlandi va shunday davom etmoqda. Ammo ba’zi jihatlar ham borki, ular ko‘ngilni xijil qilmoqda.

Birinchi navbatda, klublarimizning OCHLdagi ishtiroki. Qarang, amaldagi chempionimiz 4ta o‘yindan 3tasini boy berib o‘tirsa-ya... Bu qanaqasi? Hukumatimizning futbolga kuchli e’tiboriga javob shumi?

Ha, futbolda zo‘rdan zo‘ri chiqadi, hamma g‘alabaga intiladi. Ammo tan olaylik, 4ta o‘yinda 3 ochko - bu «Lokomotiv»ning asl imkoniyatiyu, hozirgi tarkibiga muvofiq emas aslo.

Ayniqsa, Toshkentda «Al-Duhayl»ga qarshi kechgan oxirgi o‘yin hafsalamizni pir qildi. Aytish mumkinki, jamoa shunchaki, professionallikka bepisand qaragani oqibatida tayyor g‘alabani qo‘ldan chiqardi.

Eslang, Shuhrat Muhammadiyev oxirgi daqiqalarda jarohatlangach, uning o‘rniga Salim Mustafoyev tushirildi. Biroq darhol emas, chamasi 3-4 daqiqadan keyin. Chunki zaxira vakillari bamaylixotir o‘tirishgandi.

Mustafoyev zarurat tug‘ilganidan keyingina futbolka kiyganiyu, to‘g‘ri maydonga tushganini ham ekran orqali ko‘rdik. Oqibatda aynan u ketma-ket ikki marta qo‘pol xatoga yo‘l qo‘ydi va...

Endi ayting, professionallikmi bu? Zaxirachilar har damda tayyor turishmaydimi? Bunda kimni ayblash kerak - futbolchilarnimi yoki murabbiyni? 

Shokirjon BAHRIYEV, Marg‘ilon shahri.