“Lokomotiv” – “Paxtakor” jamoalari o‘rtasidagi uchrashuvdan so‘ng o‘tkazilgan matbuot anjumanida “sherlar” ustozi Shota Arveladze hamda Dilshod Rahmatullayev ishtirok etdi.

Arveladze: - Bugun taktik o‘yinga guvoh bo‘ldik. Harakatlardan ko‘ra taktikaga amal qilish ko‘proq bo‘ldi. Ahmedov charchagani sababli almashtirishni so‘radi. Uning o‘rniga ushbu vazifani bajaradigan Griffitsni tushirdim. Chunki markazdagi o‘yin xarakterini o‘zgartirish va standart holatlardan foydalanishni o‘ylagandik. Yaxshiboyev esa juda yaxshi harakat qildi.

Pressing qilishda kuchni ham hisobga olish zarur. Har ikki jamoada tayyorlanishga qisqa vaqt bo‘ldi. Futbolchilar o‘ylagan holda o‘ynashga urinishdi. Ayni paytdagi holatimizni hisobga olib, har bir uchrashuvda zafar quchishga intilamiz. Navbatdagi raqibni yengishni o‘ylab, bellashuvlarga tayyorgarlik ko‘ramiz. Kuchli oltilikda kimlar bo‘lishini yakunda ko‘rib olamiz.

Rahmatullayev: - Bizni qo‘llab turgan muxlislarimizga katta rahmat aytaman. O‘yinda ko‘proq vaziyatlar yaratdik, ammo ulardan foydalana olmadik. Raqib bugun asosan qarshi hujumlarda o‘ynashga intildi. Oxirgi zarbani berish ustida ishlayapmiz. Ba’zan bu foyda bermayapti. Mashg‘ulotlarda bu jihat ustida ter to‘kamiz.