«Navbahor» - «Neftchi» (1:1) uchrashuvidan so‘ng Ilhom Mo‘minjonov va Sardor Sulaymonovlar o‘z fikrlarini bildirib o‘tdi.
Ilhom Mo‘minjonov: - O‘yin haqida nima deyish mumkin. «Neftchi» jamoasiga qarshi uchrashuvda himoyadagi qo‘pol xato evaziga durangga erishdik.
Aynan shu xato qimmatga tushdi. O‘z navbatida yarim himoyachi va hujumchilarimiz o‘zlarini ko‘rsata olmay, yaratilgan vaziyatlarni golga aylantirishda faol bo‘lishmadi. Durang natijaga erishganimiz bilan hayot to‘xtab qolmaydi. Shunday ekan, keyingi o‘yinlarga munosib tarzda tayyorgarlik ko‘ramiz.
O‘yinga e’tibor qaratgan bo‘lsangiz, ko‘proq pozision hujumlar tashkil etishga urg‘u berdik. Golni ham aynan kombinasion hujum yordamida urdik. Futbolchilarda imkoniyatni boy berilayotgan paytlarda to‘pni oldinga tepish hollari ko‘p kuzatiladi. 65 daqiqa davomida havodan emas, pastdan to‘p oshirishlarni amalga oshirish orqali to‘p surishdi.
0:1 hisobidan keyin futbolchilarimizning har birida g‘alaba qozonish uchun intilishgani sababli, ko‘proq havodan to‘p oshirildi. Azamat Allaniyozov bahs davomida Shukurali Po‘latov bilan havodagi kurashlarning aksariyatida raqibidan ustun keldi. Goldan oldin ham aynan Allaniyozovning havodagi to‘pni yutishi natijasida hujum davom etib, hisobni tenglashtirdik.
Muxlislar uchun har qanday holatda ham g‘alaba kerak. Bugun ishqibozlarimizga yutuqni taqdim eta olmadik. Shu sababli, ularning oldida yuzimiz yorug‘ bo‘lmadi deb o‘ylayman. Bu futbol. Shunday ekan, keyingi o‘yinlarda muxlislarimizni hursand qilishga harakat qilamiz. Oldinda jiddiy va muhim uchrashuvlarimiz bor.
Bugun muxlislarimiz azaliy raqibimizni mag‘lubiyatga uchrata olmaganimiz sababli xafa bo‘lishdi. Farg‘onaliklar 9-turga kelib, atigi bitta gol urishgandi. Ularning urgan ikkinchi golini darvozamizga kiritilganligi alam qiladi. Ishqibozlarimiz keyingi uchrashuvlarda jamoani qo‘llab-quvvatlab turishsa, ularga chiroyli o‘yinlar va g‘alabalarni taqdim etib, ularni xursand qilamiz.
Sardor Sulaymonov: - Uchrashuvda g‘alaba qozonish uchun qo‘ldan kelganicha harakat qildik. Yaratilgan vaziyatlardan foydalana olmay, durang bilan cheklandik. Nasib qilsa, keyingi o‘yinlarda g‘alaba qozonib, muxlislarimizni xursand qilishga intilamiz.
