O‘zbekiston futbol assosiasiyasi tomonidan yurtimizda futbolni rivojlantirish va ommalashtirish, sog‘lom turmush tarzini targ‘ib qilish borasida bir qator chora-tadbirlar amalga oshirishda davom etmoqda.

Xabaringiz bor, O‘zbekiston futbol assosiasiyasi 1-vise-prezidenti Umid Ahmadjonovning topshirig‘iga ko‘ra “Bunyodkor” stadionida “Ochiq eshiklar” tadbirlari o‘tkazilmoqda.

Ana shu tadbirlar doirasida Urush va mehnat faxriylari, maktab o‘quvchilari, bog‘cha tarbiyalanuvchilari uchun stadionga ekskursiyalar tashkil qilinyapti.

Shuningdek, kuni kecha Andijon viloyati futbol internatining 2004 yilda tavallud topgan futbolchilaridan iborat jamoasi Toshkent shahrida tashkil etilgan musobaqa doirasida "Bunyodkor" stadioniga tashrif buyurishdi.

Stadionga tashrif buyuruvchilar matbuot anjumanlari zali, futbolchilarning kiyim almashtirish xonalari, klub muzeyi va boshqa diqqatga sazovor joylar bilan yaqindan tanishishdi.

Bu kabi tadbirlar yurtimizda sportning futbol turini yoshlar o‘rtasida targ‘ib qilish bilan birgalikda, O‘zbekistonda ichki turizmning rivojiga ham katta hissa qo‘shishi aniq.