Bugun, 22 may kuni Milliy olimpiya qo‘mitasida O‘zbekiston yengil atletika federasiyasining navbatdan tashqari hisobot-saylov konferensiyasi tashkil qilindi. Unda Milliy olimpiya qo‘mitasi Bosh kotibi Jasur Matchanov, MOQ Prezidenti maslahatchisi Komiljon Xudoyberganov, yengil atletika federasiyasi bosh kotibi Kamoliddin Nurmuhammedov hamda federasiya mutasaddilari ishtirok etdilar.
Yig‘ilish avvalida Komiljon Xudoyberganov delegatlarni kun tartibi bilan tanishtirdi. Unga ko‘ra, konferensiyaning eng asosiy masalasi O‘zbekiston yengil atletika federasiyasiga yangi prezident va bosh kotibni saylab olishdan iborat edi.
O‘zbekistonda yengil atletika sportining rivojiga qo‘shgan hissasi, qolaversa sohadagi tajribasi va ko‘p yillik mehnati inobatga olinib, Andrey Hakimovich Abduvaliyev nomzodi federasiya prezidentiliga ilgari surildi. Delegatlar bir ovozdan A.Abduvaliyev nomzodini qo‘llab-quvvatladilar. Shu tariqa, Andrey Abduvaliyev O‘zbekiston yengil atletika federasiyasining yangi rahbari etib saylandi.
Ma’lumot uchun, Andrey Abduvaliyev 1966 yilda tug‘ilgan. MDH birlashgan terma jamoasi safida 1992-yilgi Olimpiya o‘yinlarida chempionlikni qo‘lga kiritgan. 2000-2012 yillar davomida O‘zbekiston yengil atletika federasiyasining bosh kotibi lavozimida faoliyat olib borgan.
Mamlakat yengil atletika federasiyasi bosh kotibi sifatida faoliyat yuritib kelgan Kamoliddin Nurmuhammedov esa lavozimiga qayta saylandi. Yangi rahbariyat oldiga mamlakatimizda sportning ushbu turini rivojlantirish, oldinda turgan nufuzli musobqalarda muvaffaqiyatli natijalar qayd etish vazifasi qo‘yildi.
MOQ Bosh kotibi Jasur Matchanov yangi rahbariyat oldiga qo‘yilayotgan vazifani tushuntirar ekan, yengil atletikani yurtimizda rivojlantirish uchun imkoniyatlar katta ekanligi, buning uchun ishni to‘g‘ri yo‘lga qo‘yib, qattiq mehnat qilish lozimligini qayd etdi.
