Bugun futbol bo‘yicha jahon chempionatiga start beriladi. Futbol olamining har 4 yilda o‘tkaziladigan eng katta musobaqasi bir oy davomida butun dunyo muxlislarining e’tiborida bo‘ladi. O‘zbekistonlik ishqibozlar ham mazkur Mundialni katta qiziqish bilan kuzatib borishadi.

Musobaqaning ochilish o‘yini, an’anaga ko‘ra, mezbonlar ishtirokida bo‘ladi. "A" guruhidan o‘rin olgan Rossiya terma jamoasi Saudiya Arabistoniga qarshi bahs olib boradi. Mazkur bahs Toshkent vaqti bilan 20:00da boshlanadi. Undan oldin esa JCH-2018ning ochilish marosimi bo‘lib o‘tadi. Unda 17ta mamlakat rahbarlari ishtirok etishi kutilmoqda.

Jahon chempionati bahslari Rossiyaning 11ta shahrida joylashgan 12ta stadionda o‘tkaziladi. Qiziq tomoni, Mundial ilk marta ikki qit’ada — Yevropa va Osiyoda bo‘lib o‘tadi.

Stadion.uz sayti mazkur ulkan musobaqani imkon qadar batafsil yoritib borishga harakat qiladi. Muxlislarga qulay bo‘lishi uchun saytimizda maxsus bo‘lim yaratildi. Unda siz JCH-2018 bilan bog‘liq barcha ma’lumotlar (taqvim, guruhlar, natijalar, videolar, xabarlar, tarkiblar va boshqa qiziqarli ma’lumotlar) bilan tanishib borishingiz mumkin.

Barchani boshlanayotgan ulkan futbol bayrami bilan tabriklaymiz! Biz bilan birga bo‘ling.