Jahon chempionatining 1-turi doirasida eng qiziqarli va eng shiddatli o‘yin bo‘lib o‘tdi. Portugaliya va Ispaniya terma jamoalari o‘rtasidagi o‘yinda muxlislar naq 6ta golga guvoh bo‘lishdi.

Uchrashuv Santush shogirdlari uchun omadli boshlandi. Ronaldu bahsning 4-daqiqasida penalti ishladi va uni o‘zi samarali amalga oshirib, hisobni ochdi.

Ispanlar hisobni tenglashtirish uchun 20 daqiqa sarflashdi.  Oldingi chiziqqa yetkazilgan to‘pni Diyego Kosta egalladi hamda Pepeni 2-3 marta chalg‘itib, 15 metrdan aniq zarba berib, darvozani ishg‘ol qildi.

Birinchi bo‘lim tugash arafasida Krishtianu yana jamoasini oldinga olib chiqdi. Uning jarima maydonchasi tashqarisidan yo‘llagan unchalik kuchli bo‘lmagan zarbasidan so‘ng to‘p DAvid de Xeaning qo‘llaridan sirpanib, darvoza to‘ridan o‘rin oldi.

Ikkinchi bo‘limda tashabbusni o‘z qo‘llariga olgan ispaniyaliklar nafaqat hisobni tenglashtirishdi, balki oldinga chiqib olishdi. Dastlab jarimadan yetkazilgan uzatmani Buskets bosh bilan darvozabon maydonchasiga tashlab berdi. Diyego Kosta esa yaqin masofadan darvozani ishg‘ol qilib, dublni rasmiylashtirdi.

Oradan 3 daqiqa o‘tib "qizil furiya" chap tomondan yaxshi hujum tashkil qildi. Ammo to‘p jarima maydonchasi tashqarisi tomon yo‘l oldi.  Nacho 19 metrlardan zarba berdi. To‘p esa darvozaning birdaniga 2ta ustunga tegib, so‘ngra to‘rga borib tushdi.

Ispaniya hisobda oldinga chiqib olgach, to‘pni nazorat qila boshladi. O‘yin tugashiga 3 daqiqa qolganida Ronaldu jarima zarbasi ishlashga muvaffaq bo‘ldi. Uning superzarbasi de Xea qaytara olmadi. 3:3!

Shu tariqa, Ispaniya g‘alabani qo‘ldan chiqardi, Ronaldudan esa musobaqaning dastlabki xet-trik muallifiga aylandi!

JCH-2018. "V" guruhi, 1-tur
Portugaliya – Ispaniya 3:3 (2:1, 1:2)
Gollar: 1:0 – 4, penalti Ronaldu, 1:1 – 24 Diyego Kosta, 2:1 – 44 Ronaldu, 2:2 – 55 Diyego Kosta, 2:3 – 58 Nacho, 3:3 – 88 Ronaldu.
Portugaliya – Ruy Patrisiu, Soaresh, Pepe, Fonte, Gerreyru, Bernardu Silva (Kuarejma, 69), Moutinyu, Vilyam Karvalyu, Brunu Fernandesh (Joau Mariu, 68), Gonsalu Gedesh (Andre Silva, 80), Ronaldu.
Ispaniya – De Xea, Nacho, Pike, Ramos, Alba, Koke, Buskets, Inyesta (Alkantara, 70), Silva (Vaskes, 86), Diyego Kosta (Aspas, 77), Isko.
Ogohlantirishlar: Buskets (17), Brunu Fernandesh (28).