O‘zbekiston futbol assosiasiyasi yurtimizda malakali murabbiylarni tayyorlash, ularning saviyasini muntazam ravishda oshirib borish yo‘nalishida bir qator chora-tadbirlarni amalga oshirishda davom etmoqda.

Shu maqsadda O‘FA mutaxassislari tomonidan yurtimizning turli viloyatlarida OFK va O‘FAning murabbiylik lisenziyalariga ega mutaxassislarning kasbiy malakasini aniqlash bo‘yicha seminarlar tashkil qilinayotgani haqida avval xabar berib o‘tgandik.

Ana shunday seminarlardan biri Urganchda boshlandi. Tadbirda Xorazm viloyatida murabbiylik bilan shug‘ullanuvchi futbol mutaxassislari ishtirok etishmoqda. Seminarning dastlabki kunida barcha murabbiylardan bilim va ko‘nikmalari bo‘yicha imtihon olindi. Keyin amaliy mashg‘ulotlarga navbat beriladi.

Imtihonlar natijalari ko‘ra murabbiylik faoliyati bilan shug‘ullanish talabiga javob bermaydigan mutaxassislar tegishli murabbiylik sertifikatlari va lisenziyalaridan mahrum qilinadi.

Seminarni O‘zbekiston futbol assosiasiyasining murabbiylar tayyorlash bo‘limi boshlig‘i Shovkat Imamov olib bormoqda.