Rossiyada futbol bo‘yicha jahon chempionati o‘tkazilishi vaqtida poytaxt Moskva shahri turistlardan qancha daromad ko‘rgani hisoblab chiqildi.

Ma’lum bo‘lishicha, Moskva chempionat davomida 19 milliard rubl foyda ko‘rgan, shundan 13 milliardi poytaxt byudjetiga tushgan.

“Moskva byudjeti 13 milliard rublga yaqin foyda oldi. Buni nima bilan solishtirish mumkin? “Lujniki” stadioni bizga 25 milliard rublga tushdi”, deydi Moskva meri Sergey Sobyanin.

Mer “Lujniki” bu toifa stadionlarning eng arzoni ekanini ta’kidlagan va uni qurishga ketgan mablag‘ning yarmi turistlar hisobidan qoplanib bo‘lganini qo‘shimcha qilgan.

Moskvaga kelgan muxlislar 96,6 milliard rubl sarflaganlar. Chempionat davomida poytaxtga jami 3,8 million nafar turist kelgan.

Eslatib o‘tamiz, Rossiyada o‘tgan musobaqada Fransiya Xorvatiyani 4:2 hisobda yengib chempion bo‘ldi.