O‘zbekiston futbol assosiasiyasi yurtimizda futbolni rivojlantirish va yangi bosqichga olib chiqish maqsadida bir qator futboli rivojlangan xorijiy mamlakatlar futbol assosiasiyalari bilan yaqin hamkorlikni yo‘lga qo‘yib kelmoqda.
O‘zbekiston futbol assosiasiyasi 1-vise-prezidenti Umid Ahmadjonov tashabbusi bilan Italiya futbol assosiasiyasi bilan ham hamkorlik bo‘yicha kelishuvga erishilgani haqida avval xabar berib o‘tgandik.
Kelishuvga asosan, Italiya murabbiylari assosiasiyasi prezidenti va Italiya futbol federasiyasi murabbiylar maktabi rahbari Renso Ulivyeri hamda Italiya futbol federasiyasining Yoshlar sektori texnik koordinatori, "Atalanta" klubi akademiyasi mutaxassisi Stefano Bonakkorsolar Toshkentga tashrif buyurb, yurtimizdagi murabbiylar uchun seminar o‘tkazishmoqda.
Bugun Milliy olimpiya qo‘mitasi Prezidenti va O‘FA 1-vise-prezidenti Umid Ahmadjonov Renso Ulivyeri va Stefano Bonakkorsolar bilan uchrashdi.
Uchrashuv davomida Italiya futbol federasiyasi bilan o‘zaro hamkorlikni yo‘lga qo‘yish, yurtimizdagi mutaxassislar, jumladan, futbol murabbiylarining malakasini oshirishda Italiya futboli tajribasidan unumli foydalanish, ish o‘rganish maqsadida murabbiylarimizni Italiyaga yuborish masalalari muhokama qilindi.
Ma’lumot uchun italiyalik mutaxassislar tomonidan o‘tkazilayotgan seminarlar davomida murabbiylarga mashg‘ulot o‘tkazish tartibi, uchrashuvlarga taktik va jismoniy tayyorgarlik ko‘rish masalalari bo‘yicha o‘quv kurslari tashkil qilinadi. Seminarlarning so‘nggi kuniga seleksionerlar ham jalb qilinadi. Kunning dastlabki qismida nazariy mashg‘ulotlar o‘tilsa, kunning ikkinchi qismida esa amaliy mashg‘ulotlarga navbat beriladi.
