O‘zbekiston terma jamoasi 1994 yilgi Osiyo o‘yinlarida faqat bitta libos to‘plamida o‘ynab, g‘alaba qozongan, deb yozmoqda jurnalist Alisher Nikimbayev.

Asiadaning barcha 7ta o‘yinida o‘zbekistonliklar ko‘k futbolka va oq shortikda o‘ynagan. Jamoada libosning zaxira to‘plami bo‘lmagan.

O‘zbekiston futbol federasiyasi Xirosimaga terma jamoani yuborishdan oldin, omborda birorta libos to‘plami yo‘qligini aniqlagan. Shunda, tadbirkor Dmitriy Shchelochkovga zudlik bilan libos tikishga buyurtma berilgan (hozirgi kunda uning kichik fabrikasi bor). Shchelochkov topshiriqni tezda bajarib, ko‘k rangli futbolkalarni tikib bergan. Faqat futbolkalarni. Oq rangli shortiklar va getrilar esa O‘FF omboridan topilgan. 

Shchelochkov futbolkalarni faqat raqamlab bergan, hech qanday familiya yozmagan. Xirosimaga yetib borgach, familiya yozilmagan futbolkalarda maydonga tushish mumkin emasligi ma’lum bo‘lgan. Ilk o‘yingacha esa atigi 1 kun qolgan edi. Shunda Yaponiya va O‘zbekiston do‘stlik jamiyati vakillari yordamida, dam olish kuni bo‘lishiga qaramay, kichik bir firma topilib, barcha futbolkalarga familiyalar yozilgan.

Natijada, musobaqa boshlanishiga bir necha soat qolganida O‘zbekiston terma jamoasi liboslarning yaroqli to‘plamiga ega bo‘lgan. Qizig‘i shundaki, bu to‘plam yagona edi va bo‘lajak raqiblardan hech kim ko‘k libosda o‘ynashni istab qolmasligini umid qilish mumkin edi xolos.

Amalda shunday bo‘lib ham chiqdi. Barcha 7ta raqib ko‘k bo‘lmagan liboslarda maydonga tushdi. Bu esa O‘FFni noxush holatlardan qutqarib qoldi.

Eslatib o‘tamiz, Xirosima-94 finalida O‘zbekiston terma jamoasi Xitoyni 4:2 hisobida yengib, bosh sovrinni qo‘lga kiritgan edi.