O‘zbekiston futbol assosiasiyasi yurtimizda futbolni yanada ommaviylashtirish, sog‘lom turmush tarzini targ‘ib qilish, o‘zbek futbolini yangi bosqichga olib chiqish uchun birinchi galda bolalar futbolini rivojlantirishga katta ahamiyat qaratayotgani hech kimga sir emas. 

Shu maqsadda yurtimizga xorijdan bolalar futboli bo‘yicha bir qator mutaxassislar taklif etilmoqda. Futboli rivojlangan yurt vakillari mamlakatimizda bolalar futbolini rivojlantirish uchun o‘z tajribalari bilan o‘rtoqlashishyapti.

Bolalar futbolini rivojlantirishda futbol maktablarining ham hissasi katta. Jumladan,   “Junior” futbol maktabi yosh futbolchilarni jahon futboli andozalari ostida tarbiyalashga katta ahamiyat qaratmoqda. Shu maqsadda futbol maktabi rahbariyati O‘zbekiston futbol assosiasiyasi bilan hamkorlikda maxsus dastur ishlab chiqib, xorijdan kuchli mutaxassislarni jalb qilgan. Bundan tashqari, dunyoning grand klublari bilan hamkorlikni ham yo‘lga qo‘ymoqda.

“Junior” futbol maktabi Ispaniyaning “Barselona” klubi akademiyasi bilan bu borada muzokaralar o‘tkazdi hamda ushbu muzokaralarni muvaffaqiyatli yakunlashga erishdi. “Barselona” klubi akademiyasi direktori Karlos Martin  “Junior” futbol maktabida tahsil olayotgan iqtidorli bolalarni kataloniyaliklar akademiyasida mashg‘ulot o‘tkazishga taklif qildi.

Ushbu taklifga asosan “Junior” futbol maktabi tarbiyalanuvchilari “Barselona”ning asosiy tarkibi mashug‘ulot olib boradigan JoanGamper bazasida joylashgan maydonlarda mashg‘ulot o‘tkazish baxtiga musharraf bo‘lishdi. Bundan tashqari, yosh futbolchilar “Nou Kamp” stadioini va klub muzeyiga ekskursiya uyushtirib, jahon futboli afsonalari to‘p surgan va to‘p surayotgan “Barelona” klubi bilan yaqindan tanishishga muvaffaq bo‘lishdi.