Ўзбекистон футбол ассоциацияси юртимизда футболни янада оммавийлаштириш, соғлом турмуш тарзини тарғиб қилиш, ўзбек футболини янги босқичга олиб чиқиш учун биринчи галда болалар футболини ривожлантиришга катта аҳамият қаратаётгани ҳеч кимга сир эмас.
Шу мақсадда юртимизга хориждан болалар футболи бўйича бир қатор мутахассислар таклиф этилмоқда. Футболи ривожланган юрт вакиллари мамлакатимизда болалар футболини ривожлантириш учун ўз тажрибалари билан ўртоқлашишяпти.
Болалар футболини ривожлантиришда футбол мактабларининг ҳам ҳиссаси катта. Жумладан, “Junior” футбол мактаби ёш футболчиларни жаҳон футболи андозалари остида тарбиялашга катта аҳамият қаратмоқда. Шу мақсадда футбол мактаби раҳбарияти Ўзбекистон футбол ассоциацияси билан ҳамкорликда махсус дастур ишлаб чиқиб, хориждан кучли мутахассисларни жалб қилган. Бундан ташқари, дунёнинг гранд клублари билан ҳамкорликни ҳам йўлга қўймоқда.
“Junior” футбол мактаби Испаниянинг “Барселона” клуби академияси билан бу борада музокаралар ўтказди ҳамда ушбу музокараларни муваффақиятли якунлашга эришди. “Барселона” клуби академияси директори Карлос Мартин “Junior” футбол мактабида таҳсил олаётган иқтидорли болаларни каталонияликлар академиясида машғулот ўтказишга таклиф қилди.
Ушбу таклифга асосан “Junior” футбол мактаби тарбияланувчилари “Барселона”нинг асосий таркиби машуғулот олиб борадиган JoanGamper базасида жойлашган майдонларда машғулот ўтказиш бахтига мушарраф бўлишди. Бундан ташқари, ёш футболчилар “Ноу Камп” стадиоини ва клуб музейига экскурсия уюштириб, жаҳон футболи афсоналари тўп сурган ва тўп сураётган “Барелона” клуби билан яқиндан танишишга муваффақ бўлишди.
