Xabaringiz bor, 6-13 oktyabr kunlari Indoneziyaning Jakarta shahrida III Paraosiyo o‘yinlari bo‘lib o‘tadi. Hamyurtlarimiz ushbu musobaqada ishtirok etish uchun poytaxtimizdan jo‘nab ketganliklari haqida xabar berib o‘tgandik.

Bugun O‘zbekiston delegasiyasining katta qismi Paraosiyo o‘yinlari o‘tkaziladigan Jakarta shahriga yetib bordi. Ularni mahalliy «Soekarno Hatta» xalqaro aeroportida O‘zbekiston Respublikasining Indoneziyadagi favqulotda va muxtor elchisi Ulug‘bek Ro‘ziqulov, O‘zbekiston Milliy Paralimpiya Assosiasiyasi ishchi guruhi a’zolari, Jakartada istiqomat qilayotgan bir guruh vatandoshlarimiz, shuningdek, tashkiliy qo‘mita tomonidan O‘zbekiston sport delegasiyasi uchun biriktirilgan ko‘ngillilar kutib olishdi.

Sportchi va murabbiylarimiz aeroportdan to‘g‘ri Kemayoran dahasidagi Paralimpiya shaharchasiga yo‘l olishdi. Ular Paraosiyo o‘yinlari davomida aynan shu yerda istiqomat qilishadi. Mazkur o‘yinlarda sportchilarimiz paralimpiya sportining dzyudo, suzish, yengil atletika, o‘q otish va pauerlifting turlarida yurtimiz sharafini himoya qiladilar.

Ma’lumot uchun, 6 oktyabr soat 18:08da (Toshkent vaqti bilan 16:08) Jakartadagi «Gelora Bung Karno Stadium»da musobaqaning tantanali ochilish marosimi bo‘lib o‘tadi. 7 oktyabrdan esa asosiy musobaqalarga start beriladi.