Namanganning “Navbahor” jamoasida jiddiy o‘zgarishlar kuzatiladi. Bu haqda klub matbuot xizmati xabar bermoqda.

“Oxirgi paytlarda “Navbahor” futbol klubida bosh murabbiy o‘zgarishi mumkinligi borasidagi gap-so‘zlar ko‘payib ketdi. “Bunyodkor” bilan bo‘lib  o‘tgan o‘yindagi mag‘lubiyatdan so‘ng Mo‘minjonovning o‘rnini boshqa bir mutaxassis egallashi mumkinligi ko‘p bora ta’kidlanmoqda. Superliga 25-turi doirasidagi Toshkentda “Bunyodkor”dan (0:2) uchralgan mag‘lubiyatdan keyin “Navbahor”ning chempionlik uchun imkoniyatlari keskin pasayib ketdi. 

“Qaldirg‘ochlar”dan uchralgan mag‘lubiyatdan muxlislarning kayfiyati tushib ketganligi bor gap. Har holda jamoa ishqibozlari Toshkentga ijobiy natija ilinjida yo‘l olishgandi. Lekin, natija kutilgandek bo‘lmadi. Ayni paytda viloyat futbol assosiasiyasi va klub rahbariyati vaziyatni o‘nglash, muxlislarning “Navbahor” jamoasiga bo‘lgan mehrini qaytarish ustida ish olib bormoqda. Barchaga ma’lumki, Namangan viloyat hokimi, viloyat futbol assosiasiyasi prezidenti Xayrulla Bozarov jamoani yuqori o‘rinlar uchun kurashishi uchun barcha shart-sharoitlarni yaratib bermoqda. Aynan viloyat rahbarining sa’y-harakatlari tufayli “Navbahor” avvalgi obro‘sini yana tiklashga intilmoqda. Klubda hammasi yaxshi bo‘lishi uchun hozir ham bosh qotirilmoqda.

Muxlislarni xotirjam qilgan holda ta’kidlash joizki, ertaga “Navbahor” jamoasida jiddiy o‘zgarishlar ro‘y berishini aytishimiz mumkin. Ertaga “Navbahor” PFKda katta yig‘ilish o‘tkaziladi va klubda bir qator yangiliklar ro‘y beradi. Bir so‘z bilan aytganda, “Navbahor” muxlislarining ishonchlarini oqlash va ularni xursand qilish uchun bir qator chora-tadbirlarni amalga oshirish rejalashtirilgan.

“Navbahor” PFK matbuot xizmati.