Kuni kuni kecha Toshkentning “Bunyodkor” jamoasi ashaddiy ishqibozlari klub bosh direktori bilan uchrashdilar.

Ularning asosiy maqsadi - so‘nggi kunlarda tarqalayotgan gap-so‘zlarga aniqlik kiritish edi. Bu haqda klub Matbuot xizmati ma’lum qildi.

“Bunyodkor” PFK Bosh direktori Murod Aliyev uchun kutilmaganda bo‘lgan bu uchrashuvda muxlislarni bir savolga javob qiziqtirardi. Ya’ni, “Bunyodkor”faoliyatini davom ettiradimi?

Mazkur savolga Murod Boqiyevich quyidagicha javob berdi:

- Hozir jamoamizda moliyaviy qiyinchiliklar mavjudligi rost. Lekin biz OCHL yo‘llanmasini uchun kurash olib boryapmiz. So‘nggi yillarda akademiyamizda tarbiya topayotgan futbolchilar bilan o‘yinlarni o‘tkazmoqdamiz. Demak bu borada ishlarimiz yomon emas. “Bunyodkor” futbol klubi atrofida tarqayotgan turli gap-so‘zlar yo‘q emas. Lekin shuni ayta olamanki, hech kim bizga hali klub yopiladi degan gapni rasman aytgani yo‘q.

Tabiiyki, bu javob muxlislarni qoniqtirmadi. Ularning aytishicha, shamol bo‘lmasa daraxtning uchi qimirlamaydi. Agar ertaga rsmiy qaror chiqib qolsa juda kech bo‘ladi. Shunga hozirdan bunga oydinlik kiritish lozim.

“Ikki yil avval Osiyoning eng yaxshi yosh futbolchisi nominasiyasida biryo‘la uch futbolchi O‘zbekistondan bo‘ldi va bularning uchtasi ham “Bunyodkor” a’zolari edi. Nima uchun Vatanimizga meva berayotgan daraxtni kesib tashlash kerak? Klubimizdan o‘zbek futboliga bironta zarar yetmadi-ku? Aksincha, har bir terma jamoaga yaxshi saviyadagi futbolchilarni yetkazib beryapmiz. Iltimos, “Bunyodkor”ni saqlab qolishda yordam bering”, - deydi muxlislar klubi a’zolari.

Shuningdek, muxlislar klubi a’zolari marketing xizmatidan norozi ekanliklarini bildirishdi. Klub faqat davlat puliga qarab qolganligi oqibatida bugungi qiyinchiliklarga duch kelayotgani ta’kidlab o‘tildi.

“Qachon biz ham o‘zimiz pul ishlab topamiz? Axir butun O‘zbekiston biz haqimizda biladi. Nima uchun shu brenddan foydalana olmaymiz”, - deydi klub muxlisi.

Yig‘ilish so‘nggida Murod Aliyev muxlislardan xavotirga tushmasliklarini, kelasi yil klub albatta Superligada faoliyat olib borishini aytdi. Shuningdek, PFL ham futbolimiz rivoji yo‘lida kuchli klublarning Superligada ishtirok etishidan manfaatdor ekanini ta’kidlab o‘tdi.