O‘zbekiston Respublikasi Prezidentining 2018 yil 16 martdagi «Futbolni yanada rivojlantirish chora-tadbirlari to‘g‘risida»gi PQ–3610-sonli qaroriga asosan yurtimizda 14 ta Hududiy bolalar va o‘smirlar futbol akademiyalari hamda 1 ta Respublika bolalar va o‘smirlar futbol akademiyasi tashkil qilinganidan futbol muxlislarining xabarlari bor. 

Ushbu akademiyalarda ta’lim olayotgan futbolchilarning sifatli ta’lim olishlari, ularga kerakli barcha shart-sharoitlarni yaratib berish maqsadida O‘zbekiston futbol assosiasiyasi tomonidan bir qator chora tadbirlra amalga oshirilmoqda.

Xususan, yosh futbolchilarning to‘g‘ri ovqatlanishi ular organizmining to‘g‘ri rivojlanishi uchun muhim ahamiyatga ega. Buning uchun akademiyalarda maxsus diyetolog lavozimi tashkil etilgan bo‘lib, bugungi kunda ular bolalar uchun tayyorlanayotgan taomlarni nazorat qilib borishmoqda.

Akademiyalarda faoliyat olib borayotgan diyetologlarning malakasini oshirish maqsadida 29-30 oktyabr kunlari poytaxtimizdagi “Milliy” stadionida o‘quv-seminar kurslari tashkil etilmoqda. Bu seminarni o‘tkazish uchun malakali diyetolog Nuriddin Otaboyev taklif etilgan. Ushbu seminarda respublikamizda faoliyat olib borayotgan barcha futbol akademiyalarining diyetologlari ishtirok etishadi.