Angliya premyer-ligasining 10-turi doirasidagi so‘nggi o‘yin "markaziy bahs" maqomida bo‘ldi. "Tottenxem" o‘z maydonida "Manchester Siti"ni qabul qilib, imkoniyatni boy berishdi.

Gvardiola shogirdlari haqli g‘alabani qo‘lga kiritishdi. Mezbonlar o‘yin boshidayoq xatoga yo‘l qo‘yishdi. "Siti" darvozaboni tepib bergan to‘pni Trippyer o‘ziga bo‘ysindira olmagani natijasida Sterling egallab oldi va Mahrezga aniq uzatma berdi. Riyod esa imkoniyatdan foydalanib, hisobni ochdi. Jazoirlik futbolchi bu golni "Lester"ning marhum prezidentiga bag‘ishladi.

Bahsning qolgan qismida "shaharliklar" aqlli o‘yin namoyish qilib, "shporlar"ga hech qanday imkoniyat berishmadi. Mezbonlar hujumchisi Xarri Keyn boshqa futbolchilardan uzib qo‘yildi.

Shu tariqa, "Manchester Siti" o‘z ochkolarini 26taga yetkazib, to‘plar farqiga ko‘ra "Liverpul"dan oldinda bormoqda.

Angliya chempionati, 10-tur
Tottenxem – Manchester Siti 0:1 (0:1, 0:0)
Gol: 0:1 – 6 Marez.
Tottenxem – Lyoris, Trippyer, Sanches, Alderveyreld, Devis, Dayer (Uinks, 67), Dembele (Alli, 75), Sissoko, Lamela, Lukas Moura (Eriksen, 81), Keyn.
Manchester Siti – Ederson, Uoker, Stounz, Laport, Mendi, Bernardu Silva, Fernandinyo, Silva (Kompani, 89), Marez (Gabriel Jezus, 90), Aguero (de Bryuyne, 71), Sterling.
Ogohlantirishlar: Lukas Moura (45), Laport (53), Fernandinyo (61), Devis (90).